34:19  19  SERMON  LXIII  20  thresors  de  biens,  quand  il  me  plaist  de  monstrer  ma  grace  et  mon  amour  envers  les  hommes:  voire  i'ay  dequoy  leur  bien  faire,  non  point  a  la  facon  humaine,  mais  i'ay  des  moyens  incomprehensibles.  Mais  aussi  a  l'opposite,  quand  il  me  plaist  d'affliger  les  hommes,  ils  sentiront  que  ie  puis  ce  qu'ils  n'ont  point  comprins,  et  ce  qu'ils  n'ont  iamais  entendu.  Voila  donc  comme  Dieu  veut  que  ses  richesses  incomprehensibles  soyent  cognues  de  nous,  tant  en  ce  qu'il  lui  plaist  de  nous  eslargir  de  ses  biens,  qu'aussi  au  contraire.  Pourtant  cognoissons  quand  il  lui  plaira  de  nous  affliger,  qu'il  le  pourra  faire,  voire  d'une  facon  estrange.  Et  puis,  sommes-nous  eschappez  d'un  mal?  le  second  viendra,  voire  il  y  en  aura  une  infinite.  Voila  ce  que  nous  avons  a  retenir  de  ce  passage.  Au  reste  quand  Iob  adiouste  derechef,  Que  son  fiel  a  este  espandu  par  terre,  que  ses  reins  ont  este  ouverts  et  descirez,  retenons  ce  que  desia  nous  avons  touche:  c'est  assavoir,  que  quand  Dieu  nous  punira  et  poursuivra  iusques  au  bout,  et  que  sa  main  sera  si  griefve  et  si  pesante  que  nous  n'en  pourrons  plus,  si  est-ce  qu'il  ne  faut  point  pour  cela  que  nous  soyons  par  trop  esperdus,  et  comme  gens  eslourdis  :  mais  pensons  a  ce  que  Iob  a  cognu,  c'est  assavoir,  d'autant  que  nous  avons  affaire  a  Dieu,  que  nous  gemissions,  et  que  nous  le  facions  avec  toute  humilite:  comme  aussi  il  adiouste,  Que  ses  yeux  ont  este  ternis  de  pleur,  et  toute  sa  face,  qu'il  a  mesme  cousu  le  sac  sur  sa  peau,  et  qu'il  a  couvert  son  chef  de  poudre.  Qui  est-cc  qui  a  induit  Iob  a  ceci?  Assavoir,  d'autant  qu'il  cognoissoit  que  la  main  de  Dieu  estoit  sur  lui,  et  que  tous  les  maux  qui  lui  estoient  advenus  n'estoient  point  de  fortune,  mais  que  Dieu  le  visitoit.  Si  Iob  n'eust  este  persuade  de  cela,  que  lui  eust-il  servi  de  prendre  le  sac  sur  son  dos,  et  sur  sa  peau,  et  de  ietter  la  terre  sur  son  chef?  Il  est  vrai  que  ceux  qui  ne  pensent  nullement  a  Dieu,  ne  laisseront  pas  de  faire  de  grandes  complaintes,  et  pleurer,  et  crier:  mais  de  mettre  en  verite  le  sac  sur  leur  chef,  ils  ne  le  feront  point  s'ils  ne  regardent  bien  a  Dieu.  Cependant  les  hypocrites,  encores  qu'ils  ne  cognoissent  point  Dieu  droitement,  si  est-ce  qu'ils  en  ont  quelque  apprehension,  quand  ils  monstrent  tels  signes  de  repentance.  Il  est  vrai  que  si  nous  regardons  au  dedans,  on  n'y  trouvera  que  feintise:  mais  encores  la  ceremonie  dont  Iob  parle,  est  un  certain  signe  que  les  hommes  sont  contraints  de  confesser  que  Dieu  est  leur  Iuge.  Or  d'autant  que  Iob  a  fait  ceci  en  verite,  nous  disons  qu'il  n'a  point  este  eslourdi,  comme  seront  les  incredules.  Quand  Dieu  les  traitte  ainsi  rudement,  ils  pensent,  Voila  une  mauvaise  fortune  qui  m'est  advenue,  et  ne  regardent  pas  plus  loin.  Iob  n'en  a  pas  fait  ainsi  :  mais  il  a  cognu  et  s'est  resolu  du  tout,  qu'il  faloit  attribuer  ceci  a  Dieu.