3:19  19  EPISTRE  20  vrayes  vertus,  toutesfois  si  sont-ils  tels,1)  qu'ils  pourroyent  abuser  les  simples  et  rudes.  Les  Magiciens  et  Enchanteurs  ont  esté  tousiours  renommez  de  miracles:  l'idolatrie  des  Gentils  a  esté  nourrie  par  miracles  merveilleux,  lesquels  toutesfois  ne  sont  suffisans  pour  nous  approuver  la  superstition  ne  des  Magiciens  ne  des  idolatres.  Les  Donatistes  estonnoyent  anciennement  la  simplicité  du  populaire  de  ceste  mesme  machine,  qu'ils  faisoyent  plusieurs  miracles.  Nous  faisons  donc  maintenant  une  mesme  response  à  noz  adversaires,  que  faisoit  lors  sainct  Augustin  aux  Donatistes,  que  nostre  Seigneur  nous  a  renduz  assez  advisez  contre  ces  miracleurs,  predisant  qu'il  surviendroit  faux  Prophetes,2)  qui  par  grandes  merveilles  et  prodiges  tireroyent  en  erreur  mesme  les  eleus,  si  faire  se  pouvoit3)  (Matth.  24,  24).  Et  sainct  Paul  a  adverty  que  le  regne  d'Antechrist  seroit  avec  toute  puissance,  miracles  et  prodiges  mensongiers  (2  Thess.  2,  9).  Mais  noz  miracles,  disent-ils,  ne  se  font  ne  par  idoles,  ne  par  enchanteurs,  ne  par  faux  prophetes,  mais  par  les  Saincts:  comme  si  nous  n'entendions  point  que  c'est  la  finesse  de  Satan,  se  transfigurer  en  Ange  de  lumiere  (2  Cor.  11,  14).  Les  Egyptiens  autresfois  ont  fait  un  dieu  de  Ieremie,  qui  estoit  ensevely  en  leur  region,  luy  sacrifians,  et  faisans  tous  autres  honneurs  qu'ils  avoyent  accoustumé  faire  à  leurs  dieux.4)  N'abusoyent-ils  pas  du  sainct  Prophete  de  Dieu  à  leur  idolatrie?  et  toutesfois  ils  en  venoyent  là,  qu'estans  garis  de  la  morsure  des  serpens,  ils  cuidoyent  recevoir  salaire  de  telle  veneration  de  son  sepulchre.5)  Que  dirons-nous,  sinon  que  ç'a6)  tousiours  esté  et  sera  une  vengeance  de  Dieu  tresiuste,  d'envoyer  efficace  d'illusion  à  ceux  qui  n'ont  point  receu  la  dilection  de  verité,  pour  les  faire  croire  à  mensonge  (2  Thess.  2,  11)?  Donc,  les  miracles  ne  nous  defaillent  point,