55:188  de  scortatoribus  sumpturum,  praefatur  quae  sit  vera  effugiendae  huius  vindictae  ratio:  nempe  si  honeste  in  coniugio  vivamus.  Sit  ergo  unum  hoc  membrum,  scortationes  non  fore  impunitas,  quia  Deum  habeant  vindicem.  Et  certe  quum  societatem  viri  et  uxoris  a  se  institutam  Deus  benedixerit:  sequitur  quamlibet  ab  ea  diversam  ab  eo  damnari  et  maledici.  Quare  non  adulteris  tantum,  sed  scortatoribus  quibuslibet  poenam  denuntiat:  quia  utrique  a  sancto  Dei  instituto  discedunt,  imo  illud  violant  atque  evertunt,  promiscue  se  miscendo,  quum  una  sit  coniunctio  legitima,  quae  Dei  nomine  et  auspiciis  sancitur.  Sed  quoniam  sine  coniugii  remedio  promiscuae  ac  vagae  libidines  coerceri  nequeunt,  ideo  nobis  ipsum  commendat,  vocans  honorabile.  Quod  addit  de  thoro  impolluto,  libenter  huc  refero  ut  sciant  coniugati  non  quidvis  sibi  licere,  sed  usum  thori  legitimi  debere  esse  moderatum,  ne  quid  alienum  a  coniugii  pudore  et  castimonia  admittant.  Quqm  dicit,  in  omnibus:  intelligo  nullum  esse  ordinem  qui  a  coniugio  prohibeatur.  Nam  quod  Deus  generi  humano  in  universum  concessit,  omnes  sine  exceptione  decet.  Omnes  intelligo,  qui  coniugio  apti  sunt,  eoque  opus  habent.  Hoc  autem  disertis  verbis  exprimi  oportuit,  ut  superstitioni  occurreret,  cuius  tunc  iam  forte  semina  occulte  iaciebat  Satan,  coniugium  rem  profanam  esse,  aut  certe  a  christiana  perfectione  procul  remotam.  Nam  spiritus  illi  impostores,  de  quibus  vaticinatus  erat  Paulus,  mox  exstiterunt,  prohibentes  coniugium.  Ergo  ne  quis  stulte  imaginaretur,  coniugium  vulgo  duntaxat  hominum  permitti,  qui  autem  in  ecclesia  excellunt,  debere  eo  abstinere:  omnem  exceptionem  tollit  apostolus:  neque  tantum  docet  per  indulgentiam  concedi  (sicuti  cavillatur  Hieronymus),  sed  honore  dignum  esse  asserit.  Hac  tam  praecisa  denuntiatione  non  fuisse  territos  qui  matrimonii  prohibitionem  invexerunt  mundo,  plusquam  mirum  est:  nisi  quod  fraenum  ita  Satanae  laxari  oportuit  ad  puniendam  eorum  ingratitudinem  qui  Deum  audire  abnuerant.  5.  Mores  sine  avaritia.  Dum  avaritiam  vult  corrigere,  recte  et  prudenter  simul  iubet  nos  praesentibus  esse  contentos.  Hic  enim  verus  est  pecuniae  contemptus,  vel  saltem  magnanimitas  in  recto  et  moderato  illius  usu,  dum  eo  contenti  sumus  quod  Dominus  dedit,  sive  illud  multum  sit,  sive  exiguum.  Nam  hoc  certe  raro  contingit,  ut  avaro  quidquam  sufficiat.  Quin  potius  quibus  non  satis  est  mediocritas,  etiamsi  maximis  opibus  abundent,  semper  plus  appetunt.  Haec  est  doctrina,  quam  se  Paulus  didicisse  praedicat:  nempe  quod  noverat  abundare  et  penuriam  pati.  Ergo  qui  suae  cupiditati  modum  imposuit,  ut  aequo  animo  acquiescat  in  sua  sorte,  is  pecuniae  amorem  ex  suo  animo  expulit.