52:188  mos  esse  illorum  profectus:  quo  turpior  est  nostra  segnities,  dum  vix  pedem  unum  longo  tempore  promovemus.  3.  Quemadmodum  dignum  est  His  verbis  ostendit  Paulus,  nos  ad  gratias  Deo  agendas  obstringi,  non  modo  quum  nobis  benefacit,  sed  etiam  quum  eius  erga  fratres  nostros  beneficia  reputamus.  Ubicunque  enim  relucet  Dei  bonitas,  laude  ipsam  prosequi  decet.  Deinde  sic  cara  nobis  esse  debet  fratrum  salus,  ut  quidquid  illis  datum  est,  debeamus  inter  bona  nostra  censere.  Quin  etiam  si  reputamus  qualis  et  quam  sancta  sit  corporis  Christi  unitas,  vigebit  haec  mutua  inter  nos  communicatio,  ut  uniuscuiusque  membri  bona  in  lucro  totius  ecclesiae  deputemus.  Ergo  in  laudandis  Dei  beneficiis  semper  respicienda  est  ecclesiae  universitas.  4.  Ut  nos  ipsi  de  vobis.  Non  potuit  ampliorem  illis  laudem  tribuere,  quam  quum  dicit  se  aliis  ecclesiis  ipsos  proponere  in  exemplar:  id  enim  sibi  volunt  haec  verba:  Gloriamur  in  vobis  apud  alias  ecclesias.  Neque  enim  ambitiose  Thessalonicensium  fidem  iactabat  Paulus:  sed  quatenus  eorum  praedicatio  stimulus  esse  poterat  ad  imitationis  studium.  Caeterum  non  dicit  se  gloriari  de  fide  ipsorum  et  caritate,  sed  de  patientia  et  fide:  unde  sequitur,  patientiam  fructum  esse  ac  testimonium  fidei.  Ideo  sic  resolvi  debent  haec  verba:  Gloriamur  de  patientia,  quae  ex  fide  provenit,  et  eam  testatur  in  vobis  excellere:  alioqui  non  congrueret  contextus.  Et  certe  nihil  est  quod  nos  sustineat  in  tribulationibus,  quam  fides.  Quod  inde  satis  patet,  quia,  simulac  Dei  promissiones  nos  fugiunt,  toti  collabimur.  Ergo  quo  quisque  magis  in  fide  profecerit,  eo  ad  ferenda  fortiter  omnia  erit  patientia  instructior.  Quemadmodum  rursus  mollities  et  impatientia  in  adversis  infidelitatem  nostram  arguit:  praesertim  vero  ubi  sustinendae  sunt  pro  Evangelio  persequutiones,  illic  se  profert  vis  fidei.  5.  Ostensionem  iusti  iudicii  Dei.  Aliorum  expositiones  omitto:  hunc  puto  genuinum  esse  sensum,  quod  iniuriae  et  persequutiones^  quas  innocentes  et  pii  ab  improbis  et  sceleratis  sustinent,  quasi  in  speculo  demonstrent  Deum  fore  aliquando  mundi  iudicem.  Ac  omnino  haec  sententia  antistrophos  est  profanae  opinioni,  quam  concipere  solemus  quo-