27:188  la  ceremonie  soit  abbattue.  Apprenons  donc  qu'en  nous  esgayant  a  la  facon  des  enfans  de  ce  monde,  nous  reiettons  Dieu,  et  il  est  prive  de  son  honneur:  et  c'est  une  ingratitude  inexcusable,  quand  nous  ne  cognoissons  point  l'autheur  de  tout  bien.  Si  nous  avons  cela,  de  rapporter  toutes  nos  ioves  a  Dieu,  elles  seront  tousiours  attrempees:  outre  ce  qu'il  y  aura  une  bonne  fin,  Dieu  par  sa  maieste  nous  retiendra,  tellement  que  nous  ne  serons  point  desbordez,  ainsi  que  nous  voyons  les  povres  infideles  et  aveugles,  qui  s'esgayent  comme  bestes  brutes  en  toute  intemperance.  Nous  aurons  donc  tousiours  sobriete  et  modestie  quand  nos  yeux  seront  ainsi  dressez  a  Dieu.  Voila  pour  un  item.  Mais  cependant  aussi  Moyse  veut  que  les  peres  instruisent  leurs  enfans,  a  faire  le  semblable,  que  les  maistres  instruisent  leurs  serviteurs.  Car  ce  n'est  point  assez  que  l'homme  fidele  tasche  de  servir  a  Dieu:  mais  il  faut  qu'il  gouverne  sa  maison,  sachant  bien  qu'elle  luy  est  commise  a  ceste  fin-la,  et  qu'il  aura  a  en  rendre  conte.  Et  de  faict,  pourquoy  est-ce  qu'un  homme  aura  maistrise  sur  ses  prochains,  qui  sont  creatures  formees  a  l'image  de  Dieu:  et  cependant  Dieu  sera  prive  de  son  droict,  et  n'aura  point  le  degre  souverain?  Ou  sera-  ce  aller?  N'est-ce  point  pervertir  tout  ordre  de  nature?  Notons  bien  donc  qu'ici  nous  sommes  admonnestez  de  gouverner  tellement  nos  maisons,  que  Dieu  y  soit  honore  et  servi,  et  des  petits,  et  des  grands:  que  celuy  a  qui  Dieu  aura  donne  des  enfans,  advise  de  les  nourrir  en  droite  religion,  que  il  face  le  semblable  des  serviteurs  et  chambrieres,  tellement  que  Dieu  soit  le  pere  commun,  et  le  maistre  a  tous.  Voila  dequoy  Moyse  a  voulu  advertir  les  Iuifs:  et  en  leurs  personnes  il  nous  faut  aussi  auiourd'huy  estre  enseignez  de  faire  nostre  devoir  en  cela.  Et  cependant  nous  sommes  aussi  exhortez  a  humanite.  Car  combien  que  le  maistre  d'une  maison  ait  authorite  par  dessus  sa  famille:  toutesfois  quand  il  s'esiouit,  il  ne  doit  point  retenir  cela  a  soy:  mais  il  doit  aussi  departir  sa  ioye  a  toute  sa  famille  :  car  autrement  c'est  se  separer  d'avec  le  genre  humain,  et  il  n'y  a  point  une  communaute  que  Dieu  a  dediee.  Il  y  a  donc  ici  deux  articles  a  noter.  L'un  est,  que  celuy  qui  a  charge  d'enfans,  ou  de  serviteurs,  doit  mettre  peine  que  tout  soit  amene  a  Dieu:  et  puis,  que  ceux  qui  ont  des  gens  inferieurs,  et  qui  leur  sont  suiets  en  quelque  qualite  que  ce  soit,  doivent  estre  humains  envers  eux,  qu'ils  ne  doyvent  point  dominer  en  tyrannie,  ni  en  cruaute,  mais  en  toute  douceur:  tellement  qu'ils  les  facent  participans  du  bien  et  de  la  grace  qu'ils  auront  receus  de  la  main  de  Dieu.  Ce  que  Moyse  adiouste  des  Levites  est  pour  plus  ample  confirmation  de  ce  qu'il  avoit  dit,  qu'on  se  doit  esiouir  en  la  presence  de  Dieu.  Car  (comme  desia  nous