1:188  [CO  1.  188]  verum  est:  incertum  scindi  studia  in  contraria  vulgus,  1)  satius  mihi  videtur  eo  eligendi  munere,  vel  magistratum,  vel  senatum,  vel  seniores  aliquot  defungi,  advocatis  semper,  ut  dixi,  nonnullis  episcopis,  quorum  fidem  et  probitatem  spectatam  habeant.  Sed  haec  melius  prospicere,  pro  re  et  tempore  possunt  principes,  aut  liberae  civitates,  quibus  pietas  cordi  est.  Certe  rectam  ordinationem  penitus  corruperunt  cornuti  praesules,  suis  iuribus  collationum,  praesentationum,  repraesentationum,  patronatuum  et  aliis  id  genus  tyrannicis  dominiis.  Verum  ita,  inquiunt,  exigebat  temporum  corruptio, [p. 385]  [OS  215]  ut  quoniam  apud  plebem  et  magistratus  plus  valebant  odia  et  studia  in  assumendis  episcopis,  quam  rectum  sanumque  iudicium,  eius  rei  arbitrium  paucis  primoribus  episcopis  deferretur.  Fuerit  sane  hoc  extremi  mali  in  rebus  deploratis  remedium.  Verum  ubi  medicina  morbo  ipso  nocentior  apparuit,  cur  non  et  novo  huic  malo  succurritur?  Sed  canones  exactissime  cavent,  ne  sua  potestate  in  ecclesiae  perniciem  abutantur  episcopi.  Quanquam,  si  verum  fatemur,  canones  ipsi  potius  faces  sunt  in  universum  orbis  excidium  accensae,  quam  ad  retinendam  bonae  disciplinae  moderationem  cautiones.  Hoc  tamen  omitto.  Quid  tamen  mihi  canones  iactantur,  qui  suis  autoribus,  quoties  libet,  mera  sunt  ludibria?  An  vero  dubitamus,  quin  sanctissimis  legibus  olim  plebs  se  adstringi  intelligeret,  cum  videret  sibi  regulam  e  verbo  Dei  propositam,  dum  ad  episcopum  eligendum  conveniret?  Siquidem  illi  una  vox  Dei  merito  pluris  esse  debebat,  quam  infinitae  canunculorum  myriades.  Sed  nihilominus  pessimo  affectu  corrupta,  nullam  habebat  legis  aut  aequitatis  rationem.  Sic  hodie  etsi  optimae  scriptae  sunt  leges,  manent  tamen  in  chartis  sepultae;  interim  publicis  moribus  receptum  est,  ut  soli  fere  tonsores,  coci,  muliones,  spurii  atque  eius  faecis  homines,  ecclesiarum  pastores  creentur;  parum  dico,  ut [p. 386]  episcopatus  lenociniorum  et  adulteriorum  sint  praemia.  Nam  cum  venatoribus  et  aucupibus  dantur,  praeclare  res  cecidisse  existimanda  est.  Tanta  indignitas  importune  canonibus  defenditur.  Habebat,  inquam,  olim  optimum  canonem  populus,  cui  verbum  Dei  praescribebat:  oportere  episcopum  esse  irreprehensibilem,  doctorem,  non  pugnacem,  non  avarum  etc.  (1  Tim.  3.  Tit.  1).  Cur  ergo  provincia  eligendi  ministri,  a  populo  ad  istos  praesules  translata  est?  Quia  inter  tumultus  et  factiones  populi,  verbum  Dei  non  exaudiebatur.  Et  cur  hodie  ab  episcopis  non  transferatur,  qui  non  modo  leges  omnes  violant,  sed  abiecto  pudore,  libidinose,  avare,  ambitiose,  humana  divinis  commiscent  et  confundunt?  An  hoc  vel  auditu  tolerabile  est,  1)  Virg.  Aen.  2,  39.