51:187  187  EPIST.  PAULI  AD  EPHESIOS  188  fide  :  laus,  quod  filius  Dei  per  ipsam  noster  efficitur,  ut  domicilium  in  nobis  habeat.  Neque  enim  fide  solum  agnoscimus  Christum  pro  nobis  passum,  et  pro  nobis  a  morte  suscitatum  :  sed  eum  ut  se  nobis  offert  possidendum  ac  fruendum,  recipimus  :  quod  diligenter  notandum  est.  Plerique  pro  eodem  accipiunt,  Christi  esse  participem,  et  Christo  credere.  Atqui  participatio,  quam  habemus  cum  Christo,  est  fidei  effectus.  Summa  sit,  non  procul  intuendum  esse  Christum  fide,  sed  recipiendum  esse  animae  nostrae  complexu,  ut  in  nobis  habitet.  Atque  hoc  modo  fieri  ut  spiritu  Dei  impleamur.  Ut  sitis  in  caritate.  Recenset  fructus  habitationis,  caritatem,  et  agnitionem  divinae  gratiae  et  eius  amoris,  qui  nobis  exhibitus  fuit  in  Christo.  Hanc  eandem  esse  veram  et  solidam  animae  virtutem,  sequitur.  Ideo  quoties  de  sanctorum  perfectione  agit,  duabus  his  partibus  eam  constare  docet.  Duae  similitudines,  quas  adhibet,  exprimunt  quam  firma  et  constans  debeat  esse  in  nobis  caritas.  Multi  enim  leviter  tincti  sunt  caritate:  sed  quae  facile  evanescit  aut  discutitur,  quia  parum  altas  habet  radices.  Paulus  autem  vult  eam  penitus  animis  nostris  infixam  esse,  ut  sit  quasi  bene  fundatum  aedificium  et  profunda  plantatio.  Ille  est  simplex  ac  genuinus  sensus,  nos  ita  radicitus  insitos  esse  debere  in  caritate,  et  ita  funditus  in  profundo  eius  affectu  conditos,  ut  nihil  inde  nos  dimoveat.  Unde  patet,  eos  nugari  qui  ex  Pauli  verbis  colligunt,  salutis  nostrae  fundamentum  ac  radicem  esse  caritatem.  Neque  enim  disputat  Paulus  ubi  salus  nostra  fundata  sit,  idque  omnes  vident:  sed  quam  firma  et  tenax  debeat  in  nobis  esse  caritas.  18.  Quo  valeatis  comprehendere.  Secundus  fructus,  ut  percipiant  Ephesii  quanta  sit  erga  homines  Christi  dilectio.  Talis  autem  apprehensio  vel  notitia  ex  fide  est.  Quum  in  ea  re  sanctos  omnes  illis  socios  adiungit,  indicat  praestantissimum  esse  bonum  quod  possint  in  praesenti  vita  consequi:  supremam  esse  sapientiam,  ad  quam  omnes  filii  Dei  adspirant.  Caeterum  quod  sequitur,  quum  per  se  clarum  sit,  hactenus  variis  interpretationum  opinionibus  obscuratum  fuit.  Augustinus  in  argutia  nihil  ad  rem  pertinente  sibi  valde  placuit.  Quaerit  enim  hic  mysterium  nescio  quod  in  figura  crucis:  deinde  ex  latitudine  facit  caritatem,  ex  altitudine  spem,  ex  longitudine  patientiam,  et  profunditate  humilitatem.  Haec  subtilitate  sua  placent:  sed  quid  ad  Pauli  mentem?  Nihilo  certe  magis  quam  quod  Ambrosius  sphaericam  formam  designari  putat.  Verum  aliorum  interpretationibus  omissis,  dicam  quod  omnes  simplex  et  verum  esse  agnoscent.  Paulus  enim  nihil  per  istas  dimensiones  intelligit  quam  Christi  caritatem,  de  qua  continuo  post:  significans,  eum,  cui  vere  et  perfecte  cognita  est,  undequaque  sapere:  ac  si