42:187  187-188  PROLEGOMENA.  aures  pascere,  tum  ostentationi  et  gloriae  suae  studere.  Quanquam  haud  etiam  negare  ausim  hanc  lectionum  legem  esse,  ut  in  his  seholastico  potius  quam  oratorio  more  disseratur.  Quamobrem  si  quem  offendit  simplex  hoc,  nec  tamen  inurbanum  dicendi  genus,  vel  aliorum,  vel  huius  ipsius  alia  adhibeat  opera,  eaque  praesertim  in  quibus  scholae  legibus  solutus  oratorem  non  minus  quam  theologum  in  primis  nobilem  agit.  Quod  nos  non  minus  verecunde  quam  optimi  cuiusque  et  doctissimi  bona  pace  ac  venia  dictum  non  dubitamus.  Neque  enim  de  his  ita  pronuntiamus  quasi  censorio  supercilio  huic  uni  oratoris  gloriam  vendicemus,  aut  theologum  vocando,  non  alios  quoque  insignes  permultos  agnoscamus.  Absit  a  nobis  haec  vecordia.  Sed  tanta  testificandi  animi  nostri  oblata  occasione,  vix  unquam  aliter  culpam  deprecari  possemus  apud  pios  omnes,  quibus  satis  notum  est,  nostrorum  de  Calvino  silentium  hactenus  non  satis  placuisse  turbulentis  hominibus,  quibus  vanitatem  suam  disertis  vocibus  a  nobis  exprobrari  magis  cordi  est,  quam  nos  sinere  tacito  nostro  suffragio  et  verecundo  silentio,  quum  eius  doctrinam  comprobare,  et  divinae  erga  nos  benignitatis  consignatissimum  inter  nos  testimonium  in  eo  agnoscere,  tum  eorum  insaniam  fraterna  dissimulatione  tegere,  et  vero  tacite  apud  se  quemque  nostrum  gemere.  Sed,  ut  iam  dixi,  nuda  hic  et  simplex  est  oratio,  ei  persimilis  qua  antehac  semper  in  lectionibus  uti  solitum  esse  novimus.  Non  quemadmodum  a  multis  fieri  accepimus,  qui  domi  prius  digestas  auditoribus  postea  ex  scripto  recensent:  sed  qualis  ex  tempore  fingi  formarique  potuit  ad  docendi  usum  aedificationemque  magis  quam  ad  aures  accommodata.  Quamobrem  aut  nos  vehementer  fallimur,  aut  ipsius  prophetae  mentem  ita  propemodum  ad  vivum  expressit,  ut  nihil  posse  addi  videatur.  Nam  quum  singula  quaeque  momenta  diligenter  excutit,  tum  etiam  doctrinae  usum  et  applicationem  breviter  sic  demonstrat,  ut  a  scopo  aberrare  nemo  quamvis  rudis  possit.  Denique  verae  theologiae  locos  ac  fontes  sic  aut  ostendit  aut  aperit,  ut  ex  his  cuivis  haurire  promptum  sit  quod  reiiciendae  ac  recreandae  animae  sufficiat.  Imo  vero  etiam  unde  am  pios  rivos  diducere  commode  possint  verbi  ministri,  quibus  veluti  coelesti  rore  salubriter  plebem  Domini  adspergant:  sive  exhortatione,  sive  consolatione,  sive  reprehensione,  sive  denique  aedificatione  opus  sit.  Sed  horum  omnium  veluti  speciem  et  imaginem  quandam  melius  in  omnibus  eius  concionibus  cernimus,  ac  in  his  potissimum,  in  quibus  prophetarum  doctrinam  sic  ad  haec  tempora  nostra  accommodat,  ut  suo  saeculo  non  melius  quadrare  videantur.  Sed  ut  aliquando  finem  faciamus,  restat,  christiani  lectores,  ut  quum  innumerabilia  alia  Dei  dona  quae  quotidie  in  nos  abunde  effundit,  tum  etiam  incomparabilem  bonitatis  eius  thesaurum,  qua  decet  animi  gratitudine  recipiamus  et  amplectamur:  eoque  ad  vitam  nostram  sancte  et  pie  instituendam,  ad  nominis  eius  gloriam  et  fratrum  aedificationem  utamur.  Id  autem  ut  fiat,  orandus  est  nobis  Dei  spiritus,  ut  eo  instructi  ad  sacram  lectionem  accedamus,  animumque  ab  inquinamentis  huius  carnis  repurgatum,  et  mansuetudinis  spiritum  coelestis  doctrinae  capacem  afferamus:  ad  quod  etiam  multum  nos  iuvare  poterunt  breves  precatiunculae  quas  ad  finem  cuiusque  lectionis  addendas  curavimus,  prout  a  nobis  collectae  sunt  pari  cum  lectionibus  diligentia  et  fide:  ut  et  his  reficiantur  piorum  animi,  spiritusque  novos  ad  novam  lectionem  colligant:  et  rudiores  velut  in  tabula  depictam  formandarum  orationum  suarum  ex  sacra  lectione  rationem  habeant.  Nam  sicuti  lectionum  initio  eadem  semper  utitur  hic  noster  precandi  formula,  quam  nos  quoque  hic  addi  voluimus,  ut  tota  eius  docendi  ratio  vobis  nota  esset:  ita  etiam  singulas  lectiones  novis  subinde  precationibus  claudere  solet,  prout  illi  ex  spiritu  Domini  datur  eas  ex  tempore  formare,  adque  lectionis  cuiusque  subiectam  materiam  accommodare.  Hoc  si  commentariorum  genus  vobis  placere  intellexerimus,  etsi  alieni  laboris  res  est,  tamen  fidem  nostram,  favente  divino  numine,  pro  reliquis  prophetis  obstringere  non  dubitamus.  Minores  dico  prophetas:  quos  quum  perlegendos  susceperit,  nobis  quoque  in  animo  est  non  minori  diligentia  quam  reliqua  ad  finem  usque  excipiendo  persequi.  Vos  interim  his  fruimini.  Bene  valete.  Genevae,  postridie  Idus  Febr.  M.  D.  LVII.