50:186  6.  Ab  iis  qui  videbantur.  Nondum  contentus  est  Paulus,  nisi  etiam  sciant  Galatae,  nihil  eum  didicisse  a  Petro  et  apostolis.  Hinc  superbiae  sanctum  virum  accusant  Porphyrius  et  Iulianus,  quia  tantum  sibi  arroget,  ut  nihil  ab  aliis  discere  sustineat:  quia  doctorem  se  nullo  magistro  vel  adiutore  factum  iactet  :  quia  tantopere  laboret  ne  quo  videatur  inferior.  Verum  quisquis  reputabit  quam  necessaria  fuerit  haec  iactantia,  sanctam  et  summa  laude  dignam  fuisse  agnoscet.  Nam  si  hoc  dedisset  adversariis,  sub  apostolis  se  profecisse,  duabus  eos  armasset  calumniis.  Siquidem  protinus  dixissent:  Tandem  aliquid  profecisti  ut  corrigeres  quod  ante  peccaveras,  et  pedem  a  temerario  progressu  reserree.  Ita  primo  suspecta  fuisset  tota  superioris  temporis  doctrina  et  diruta  aedificatio.  Deinde  in  posterum  quoque  minus  habuisset  autoritatis:  quia  habitus  fuisset  pro  vulgari  discipulo.  Videmus  ergo  ut  non  tam  sua  causa,  quam  asserendae  doctrinae  necessitate  in  hanc  sanctam  gloriationem  efferatur.  Hic  non  est  certamen  ambitionis,  quia  nequaquam  de  personis  agitur  :  sed  non  vult  Paulus  ullius  hominis  magnitudine  obscurari  suum  apostolatum,  cui  adiuncta  erat  doctrinae  autoritas.  Quod  si  ad  canes  illos  compescendos  non  sufficit,  eorum  tamen  latratum  abunde  refutat.  Quales  aliquando  fuerint.  Haec  seorsum  legenda  sunt.  Nam  ut  scirent  adversarii  ipsum  non  morari  hominum  existimationem,  parenthesin  istam  interposuit.  Caeterum  varie  exponunt  hunc  locum.  Ambrosius  putat  obiter  perstringi  eorum  stultitiam  qui  Paulo  obiiciebant  apostolos  ad  eum  deprimendum.  Ac  si  diceret:  Quasi  vero  mihi  non  liceat  excipere,  pauperculos  fuisse  idiotas,  qui  nihil  tenerent  praeter  artem  piscandi  :  me  vero  sub  Gamaliele  magistro  liberaliter  a  puero  fuisse  eruditum.  Sed  id  totum  omitto:  quia  scio  apud  Deum  nihili  esse  personas.  Chrysostomus  et  Hieronymus  durius  accipiunt:  quasi  oblique  minetur  etiam  primis  apostolis,  in  hunc  sensum  :  qualescunque  sint,  non  effugient  Dei  iudicium,  si  declinent  ab  officio:  non  liberabit  eos  vel  officii  dignitas,  vel  hominum  existimatio.  Mihi  haec  expositio  simplicior  videtur  et  magis  consentanea  menti  Paulinae,  ut  concedat  primos  quidem  ordine  temporis  fuisse:  sed  id  sibi  obesse  neget  quominus  gradum  nunc  suum  pariter  teneat.  Non  dicit  sibi  nihil  esse  curae  quales  sint  in  praesentia,  sed  de  praeterito  tempore  loquitur,  quo  iam  erant  apostoli,  ipse  alienus  a  Christi  fide.  In  summa,  non  vult  ex  tempore  praeterito  aestimationem  fieri:  nec  proverbium  illud  valere  in  hac  causa,  ut  qui  tempore  prior  est,  potior  sit  iure.  Personam  hominis.  Praeter  expositiones,  quas  iam  adduxi,  haec  quoque  tertia  habet  aliquid  coloris,  quod  in  mundi  politia  locum  habent  personae: