30:186  quod  e  tam  dura  servitute  et  miseria  nos  exemerit,  et  otia  haec  fecerit  et  singulis  potestatem  domi  suae  quietam  vitam  agendi,  et  liberis  suis  ac  facultatibus  utendi  fruendi  dederit.  Quod  quantum  sit  beneficium,  quantique  faciendum,  sentiremus,  si  Deus  a  nobis  auferret:  quamobrem  nimium  magna  nostra  est  ingratitudo,  quod  tantam  Dei  erga  nos  benevolentiam  non  agnoscimus,  qua  nos  ab  istiusmodi  potentiorum  iniuriis  protegit,  et  a  nobis  vim  omnem  et  rapinas  arcet,  et  ne  lana  de  dorso  nobis,  ut  aiunt  tondeatur,  impedit.  Quaeri  vero  potest  hoc  loco,  quinam  David  Saulis  armiger  factus  sit,  quandoquidem  ad  illum  usque  diem  in  pascuis  vitam  egerat,  et  ad  ovium  septa  sederat,  adeo  ut  ad  militiam  instructus  non  fuisse  videatur.  Verum  quae  de  Davide  hic  dicuntur,  et  quae  laudes  ipsi  tribuuntur,  satis  ostendunt  non  fuisse  illum  adeo  rusticum  et  incultum,  ut  non  fuerit  excellentibus  donis  et  virtutibus  insignis,  etsi  non  apud  omnes  ipsius  facta  celebrarentur.  Equidem  et  in  ipsa  paterna  domo  fateor  eum  fuisse  contemptibilem,  quemadmodum  ante  vidimus.  Nam  Isai  liberis  suis  coram  Samuele  septem  productis,  Davidis  nullam,  quasi  ne  natus  quidem  esset,  mentionem  fecit.  Ex  quo  apparet  quam  saepe  hominum  malitia  et  ingratitudine  Dei  dona  licet  in  aliquo  valde  conspicua  conculcantur  et  flocci  fiant,  ab  iis  qui  ea  non  tanti  faciunt  quanti  oporteret.  Nominatim  enim  honorificam  Davidis  fieri  mentionem  videmus,  et  dici  fortissimum  robore,  virum  bellicosum,  et  prudentem  in  verbis,  citharaque  bene  psallentem.  Quae  sane  non  parva  laus  fuit  Davidis:  raro  enim  in  iuvenibus  fortitudo  cum  prudentia  convenit;  quamobrem  eo  fuit  admirabilior  Davidis  virtus,  ad  quam  prosper  etiam  rerum  eventus  quum  accederet  magnam  sane  de  se  admirationem  ipsum  concitasse  non  mirum  est.  Neque  enim  istae  virtutes  sunt  rusticorum  propriae:  quandoquidem  natura  timidi,  agrestes,  idiotae  sunt,  et  fortitudine,  prudentia,  consilio,  industria  et  caeteris  istiusmodi  virtutibus  non  sunt  praediti,  quibus  aulici  plerumque  et  alii  homines  insignes  sunt.  Praeterea  qui  consilio  pollent,  et  iuri  dicundo  praesunt,  non  sunt  plerumque  audaces  neque  ad  arma  tractanda  habiles,  sed  ratione  et  consilio  insignes.  Quin  et  multos  viros  bonos  videas  tamen  non  esse  industrios:  ex  quibus  fit  nobis  conspicuum:  Deum  extraordinario  Davidem  istis  virtutibus  exornasse:  quae  tamen  in  illo  quamdiu  ad  pascua  sedit  quodammodo  contemnebantur  et  vilescebant.  Unde  apparet  verum  id  esse  quod  paulo  ante  dixi,  dona  Dei  licet  in  multis  conspicua,  non  tamen  pro  dignitate  recipi,  et  hominum  ingratitudine  fieri  ut  non  agnoscantur.  Verum  enimvero  licet  ita  haec  usu  veniant,  viros  tamen  bonos  quibus  sua  dona  Deus  distribuit,  decet  istam  ingratitudinem  patienter  ferre