50:185  185  CAPUT  II.  186  5.  Quibus  ne  ad  horam  quidem.  Haec  constantia  sigillum  fuit  paulinae  doctrinae.  Nam  quum  ei  instarent  falsi  fratres,  qui  nihil  aliud  cupiebant  quam  ipsum  criminari,  et  ipse  intrepide  staret,  in  posterum  omnem  dubitationem  tollebat.  Neque  enim  insimulari  iam  potest,  quod  apostolos  fefellerit.  Negat  igitur  se  vel  ad  momentum  illis  cessisse  per  subiectionem  :  hoc  est,  in  modum  subiectionis  :  ita  ut  esset  opus  illud  quasi  documentum  oppressae  libertatis:  alioqui  mansuetudine  et  tolerantia  semper  ad  vitae  usque  finem  omnibus  cedere  paratus  fuit  Ut  veritas  evangelii.  Non  erat  periculum  ne  libertate  sua  Paulus  spoliaretur,  etiam  aliis  se  subiiciendo:  sed  aliis  nocuisset  exemplum.  Prudenter  ergo  consideravit  quid  expediret.  Ita  videmus  et  quatenus  vitanda  sint  scandala,  et  quid  semper  in  rebus  mediis  sit  spectandum,  nempe  aedificatio.  Summa  est,  nos  fratrum  esse  servos:  sed  in  hunc  finem,  ut  simul  omnes  serviamus  Domino,  et  conscientiis  salva  maneat  sua  libertas.  Nam  quia  volebant  falsi  fratres  in  servitutem  adigere  pios,  non  fuit  illis  mos  gerendus.  Veritas  evangelii  accipienda  pro  genuina  eius  puritate:  vel  quod  idem  est,  pro  pura  et  integra  eius  doctrina.  Neque  enim  penitus  evangelium  abolebant  pseudoapostoli,  sed  adulterabant  suis  commentis:  ita  ut  iam  fictum  esse  inciperet  et  larvatum.  Quale  semper  est  ubi  vel  paululum  a  Christi  simplicitate  deflectimus.  Qua  igitur  fronte  verum  se  evangelium  habere  iactabunt  papistae?  quod  non  tantum  multis  figmentis  est  corruptum:  sed  multis  impiis  dogmatibus  plus  quam  adulteratum?  Meminerimus  ergo  non  satis  esse  tenere  nomen  evangelii  et  qualemcunque  summam,  nisi  solida  etiam  puritas  maneat  illibata.  Ubi  sunt,  qui  fucatis  moderationibus  conciliare  nos  papistis  volunt?  quasi  fas  sit  ex  religionis  doctrina,  sicuti  ex  pecunia  vel  praediis,  aliquid  decidere.  Videmus  quantum  ab  hoc  genere  transactionis  abhorruerit  Paulus,  qui  negat  verum  esse  evangelium,  nisi  purum.  6.  Ab  iis  autem,  qui  videbantur  aliquid  esse  (quales  aliquando  fuerint,  nihil  mea  refert:  personam  hominis  Deus  non  accipit)  .  nam  mihi  qui  videbantur  esse  in  pretio  nihil  contulerunt:  7.  imo  contra,  quum  vidissent  mihi  concreditum  fuisse  evangelium  praeputii,  quemadmodum  Petro  circumcisionis  8.  (nam  qui  efficax  fuit  in  Petro  ad  apostolatum  circumcisionis,  efficax  fuit  et  in  me  erga  gentes)^  9.  quumque  cognovissent  gratiam  mihi  datam  Iacobus  et  Cephas  et  Iohannes,  qui  videbantur  columnae  esse,  dextras  dederunt  mihi  ac  Barnabae  societatis,  ut  nos  inter  gentes,  ipsi  vero  in  circumcisionem  apostolatu  fungeremur:  10.  tantum  ut  pauperum  memores  essemus.  In  quo  et  diligens  fui,  ut  hoc  ipsum  facerem.