42:185  185-186  PROLEGOMENA.  exercitatione  peritiores  facti)  longe  verissimum  esse,  omnes  etiam  auditores  facile  agnoscent.  Consilium  autem  erat,  hac  occasione  ipsum,  si  fieri  posset,  pellicere  ad  iustos  commentarios  in  autorem  ipsum  edendos,  verum  paulo  aliter  quam  sperabamus  nobis  tunc  accidit.  Etenim  huius  consequendi  spem  omnem  nobis  ipse  praecidit  ob  unius  Buceri  reverentiam,  quem  hac  in  parte,  ut  in  omnibus  reliquis,  fidelissimam  et  utilissimam  operam  praestitisse  quum  tota  ecclesia  agnoscat,  tum  ipse  praecipue  D.  Calvinus  honorificentissime  nobis  omnibusque  semper  asseruit.  Restabat  itaque  ut  praelectiones  ipsae  qualiter  a  nobis  exceptae  fuissent,  evulgarentur.  Factum  est  autem  ut  dum  optimus  quisque  ingens  laboris  nostri  operae  pretium  sibi  promitteret,  nos  quoque  in  dies  maiorem  contentionem  adhiberemus,  ne  ea  spes  in  fumum  illis  abiret.  Itaque  seu  his  studiis,  seu  certe  piorum  commodis  accensi  tantum  effecimus  ut  ad  summam  diligentiam  nos  reliquum  nihil  fecisse  omnes  facile  iudicarent.  Quo  magis  mirum  videri  posset  quid  eum  postea  consilium  mutare  in  animum  induxerit,  ut  et  nostram  et  piorum  multorum  exspectationem  frustraretur:  et  contra  quam  vellet  in  utilissima  ecclesiae  opera  navanda  ingentem  multorum  invidiam  et  implacabile  odium  accersere  coactus  sit.  Caeterum  eos  quidem  qui  Buceri  autoritatem  simpliciter  in  hoc  negotio  obtendunt,  ut  non  iniqua  prorsus  ratione  permoveri  libenter  agnoscam  :  sic  mihi  duri  nimium  et  praefracti  videbuntur,  si  se  non  aequis  quoque  excusationibus  duci  patientur.  Quod  etiam  propediem  factum  iri  spero.  Quod  autem  ad  eos  attinet  qui  insano  maledicendi  amore  feruntur,  et  rixandi  minimas  quasque  occasiones  aucupantur,  quemadmodum  pii  omnes  talia  monstra  aversari  ac  detestari  debent,  ita  his  ut  satisfiat  non  magnopere  laborandum  est.  Canum  enim  latratus,  qui  ecclesiae  modo  obfuturus  non  sit,  sine  magno  periculo  dissimulari  et  despici  poterit.  Atque  haec  quidem  praefanda  habuimus  in  eorum  gratiam  qui  nos  saepius  de  Psalmorum  praelectionibus  interpellarunt,  ne  se  putent  vana  exspectatione  a  nobis  delusos  esse.  Nam  pro  his  sciant  se  aliquando,  Deo  propitio,  iustos  et  integros  commentarios  habituros.  Quod  si  eos  adhuc  gravius  longum  hoc  afficit  desiderium,  cogitent  nos  quoque  non  minus  anxie  tantum  thesaurum  expetere.  Caeterum,  par  est  utrosque  assiduis  viri  et  gravissimis  occupationibus  veniam  dare,  et  modum  aliquem  huic  nimium  prurienti  et  praematuro  desiderio  statuere.  Parcere  etiam  homini  aequum  fortasse  vel  uno  eo  nomine  fuerit,  quod  omnium  minime  ipse  sibi  parcat,  haud  ullam  unquam  ab  insano  labore  quietem  aut  animi  relaxationem  capiens.  Ut  nemini  iam  dubium  sit,  divina  non  modo  benignitate,  sed  insigni  et  ad  posteros  nunquam  non  praedicando  miraculo  corpusculum  hoc  trahere,  natura  imbecillum,  crebris  insuper  morbis  vehementer  affectum,  immensis  deinde  laboribus  exhaustum  :  postremo  assiduis  impiorum  aculeis  confossum,  et  omni  contumeliarum  genere  undique  afflictum  et  divexatum.  Sed  quoniam  huius  loci  querelae  non  sunt:  ad  vos  nunc,  christiani  lectores,  venio,  quibus  hoc  praelectionum  opus  in  Hoseam  prophetam  dicare  nobis  in  animo  est.  Dicamus  autem,  non  quod  quidquam  in  eo  nobis  proprium  vendicemus  praeter  solam  diligentiam,  quam  in  his  colligendis  adhibuimus:  sed  tanquam  nostrum  facere  non  dubitamus,  quod  nunquam  nisi  auspiciis  nostris  ad  vos  pervenisset.  Nam  etsi  dignam  omnino  rem  esse  iudicaremus,  quae  ecclesiae  Domini  offerretur,  autori  tamen  ipsi  vix  tandem  hoc  persuadere  potuimus,  donec  importunis  precibus  hac  lege  vinci  se  a  nobis  passus  est,  ut  fide  nostra  esset  quale  posthac  iudicium  de  eo  boni  omnes  facerent:  suorum  adeo  iniquus  aestimator  est.  Nos  vero,  tametsi  verecunde  ea  paulo  plus  quam  par  erat  extenuat,  nihilominus  promittere  nobis  audemus  non  modo  autori  ipsi  apud  vos  iustum  laboris  sui  constaturum  operae  pretium,  sed  nos  quoque  gratiam  non  vulgarem  esse  inituros.  Neque  enim  eo  minus  iucundas  vobis  fore  has  lectiones  confidimus,  quod  scholae  (ut  par  erat)  inserviens,  aliquanto  longius  a  solita  suorum  omnium  gratia,  et  orationis  ornatu  autor  ipse  recessit.  Nam  quum  ingenti  negotiorum  mole  oppressus,  vix  plerumque  semihorae  spatio  meditatas  lectiones  domo  afferre  cogeretur,  auditorum  aedificationi  et  commodis  maluit,  vero  sensu  eliciendo  et  planum  faciendo,  consulere,  quam  inani  verborum  pompa  quum  ipsorum