50:184  bene  illi  cum  apostolis  omnibus  convenire,  sublata  fuit  protinus  remora.  Nulla  amplius  alternatione  iactati  sunt  animi  rudium,  quem  sequi  deberent.  Hoc  est  igitur  quod  dicit:  Ne  periissent  ante  sumpti  labores  et  porro  sine  fructu  pergerem,  dubitationem  illam  sustuli,  quae  multos  turbabat:  mihine  an  Petro  fidem  habere  deberent.  Uno  enim  consensu  amplexi  sumus  quod  semper  docueram.  Quod  si  hodie  multis  tam  cordi  esset  aedificatio  quam  Paulo  fuit,  maiore  consentiendi  inter  se  cura  tangerentur.  3.  Sed  neque  Titus.  Alio  argumento  probat,  nihil  a  se  diversum  sentire  apostolos  :  nam  adduxerat  ad  eos  hominem  incircumcisum,  quem  agnoscere  loco  fratris  non  dubitarunt.  Causam  addit  cur  non  fuerit  circumcisus  :  nam  circumcisio  quum  res  media  esset,  potuit  vel  omitti  vel  usurpari  pro  aedificatione.  Tenenda  enim  semper  est  illa  regula,  si  omnia  nobis  licent,  ut  videamus  quid  expediat.  Ideo  Timotheum  circumcidit,  ne  offendiculum  infirmis  crearet  eius  praeputium.  Tunc  enim  agebat  cum  infirmis,  quibus  debuit  parcere.  Et  libenter  in  Tito  idem  praestitisset:  adeo  nunquam  fatigatus  fuit  in  tolerandis  infirmis:  sed  erat  diversa  ratio:  nam  calumniandae  eius  doctrinae  occasioni  imminebant  quidam  falsi  fratres,  qui  statim  famam  sparsissent,  en  iste  tam  audax  libertatis  vindex,  quum  in  conspectum  apostolorum  venit,  deponit  illos  viriles  spiritus  et  ferociam  qua,  inflatus  est  inter  imperitos.  Quemadmodum  autem  infirmis  attemperare  nos  convenit:  ita  malignis,  et  qui  data  opera  insidiantur  libertati  nostrae,  fortiter  resistendum  est.  Neque  enim  caritatis  officia  nocere  debent  fidei.  Ergo  caritas  in  usu  rerum  indifferentium  optima  erit  moderatrix,  si  modo  semper  primus  habeatur  fidei  respectus.  4.  Propter  subingressos.  Duplex  potest  esse  sensus.  Quod  non  fuerit  circumcisus,  quum  tamen  improbe  id  flagrarent  falsi  fratres  et  cogere  eum  vellent:  vel  quod  data  opera  non  circumcidit  eum  Paulus,  quia  videbat  statim  fore  ut  illi  traherent  in  calumniam.  Hac  enim  de  causa  se  insinuaverant  in  sodalitium  Pauli,  ut  alterutrum  captarent  ex  duobus.  Nempe  si  libere  contemneret  caeremonias,  invidiam  inde  illi  conflarent  apud  Iudaeos:  sin  vero  abstineret  in  totum  a  libertate,  protinus  de  illo  triumpharent  apud  gentes:  quasi  pudore  confusus  retractasset  suam  doctrinam.  Hic  secundus  sensus  mihi  placet:  quod  Paulus,  animadversis  eorum  insidiis,  noluerit  Titum  circumcidere.  Dicit  autem  se  non  fuisse  coactum,  ut  intelligant  lectores  circumcisionem  per  se  non  damnari,  ac  si  res  mala  esset:  verum  de  necessitate  eius  observanda  pugnari.  Ac  si  diceret:  Paratus  fuissem  circumcidere:  nisi  de  re  maiore  actum  fuisset.  Legem  enim  imponere  volebant:  coactioni  eiusmodi  non  fuit  cedendum.