29:183  183  SERMON  OXCVII.  184  Maintenant  nous  voyons  ce  que  Moyse  a  entendu  en  somme.  Or  par  ce  passage  nous  sommes  admonnestez,  qu'en  tout  ce  que  nous  faisons  il  nous  faut  regarder  la  volonte  de  Dieu.  Oar  si  tost  que  nous  en  declinons,  il  n'y  a  plus  d'excuse,  quelque  couleur  ou  couverture  que  nous  pretendions.  Voici  donc  une  reigle  pour  bien  discerner  entre  le  bien  et  le  mal,  que  si  les  hommes  se  rangent  a  ce  que  Dieu  leur  ordonne,  qu'ils  n'attentent  rien,  qu'ils  ne  se  donnent  nulle  liberte  de  faire  ceci  ou  cela,  sinon  qu'ils  cognoissent  qu'il  plaist  ainsi  a  Dieu:  alors  tout  ira  bien.  Et  c'est  une  doctrine  bien  notable,  afin  que  nous  ne  vaguions  point  en  nostre  vie,  et  que  nous  ne  soyons  point  aussi  en  doute  ou  scrupule  pour  nous  enquerir  de  ce  qui  est  de  faire.  Que  donc  nous  ayons  tousiours  la  volonte  de  Dieu  devant  nos  yeux,  afin  de  faire  ce  qu'il  nous  commande,  de  suyvre  la  ou  il  nous  appelle:  et  alors  si  les  hommes  nous  calomnient,  si  nous  sommes  condamnez  d'eux,  que  ce  nous  soit  tout  un  :  moyennant  que  nous  soyons  absouts  devant  Dieu,  cela  nous  doit  bien  suffire.  Car  nous  voyons  sur  quoy  est  fondee  l'absolution  que  met  ici  Moyse  pour  iustifier  la  lignee  de  Gad,  c'est  qu1  il  a  veu  qu'il  y  avoit  portion  du  legislateur,  c'est  a  dire,  que  sans  contredire  a  la  volonte  de  Dieu  qu'il  pouvoit  demander  ce  partage  ici.  Car  c'est  Dieu  qui  nous  fait  tenir  debout,  quand  il  nous  iustifiera:  et  si  tost  aussi  qu'il  prononcera  le  mot  pour  nous  condamner,  il  faut  que  nous  trebuschions,  encores  que  tout  le  monde  nous  voulust  soustenir.  Et  ce  mot  de  legislateur  est  bien  a  noter:  car  c'est  aussi  a  ce  qu'a  regarde  S.  laques,  en  disant,  qu'il  n'y  a  qu'un  seul  legislateur  qui  peut  damner  et  perdre,  et  qui  peut  sauver  aussi.  Il  nous  monstre  que  ce  n'est  pas  a  nous  de  donner  sentence  contre  nos  freres  :  car  nous  usurpons  par  trop.  Et  pourquoy?  Car  il  n'y  a  que  Dieu  (dit-il)  auquel  il  appartienne  de  condamner  et  d'absoudre.  Et  pourquoy?  Car  il  est  luy  seul  Iuge,  et  nous  sommes  subiets  a  luy:  c'est  son  office  de  nous  imposer  loy,  et  de  nous  mettre  le  ioug  sous  lequel  il  veut  que  grans  et  petis  s'humilient.  Et  ainsi,  en  ce  passage  il  est  dit,  que  Gad  ayant  cogneu  qu'il  y  avoit  portion  cachee  du  Legislateur,  il  a  licitement  peu  requerir  que  la  il  eust  son  partage,  assavoir  en  la  montagne  de  Basan,  et  qu'il  ne  trainast  pas  tousiours  son  bestail.  Nous  voyons  donc  maintenant  qu'en  la  personne  de  ceux  dont  parle  Moyse,  nous  avons  une  reigle  generale,  pour  monstrer  que  quand  nous  aurons  suyvi  ce  qui  estoit  agreable  a  Dieu,  et  que  nous  n'aurons  point  outrepasse  nostre  mesure:  que  ce  nous  est  une  approbation  pour  despitter  tout  le  monde,  quand  on  trouvera  a  redire  en  ce  que  nous  aurons  fait.  Mais  aussi  a  l'opposite,  quand  nous  n'aurons  point  a  parolle  de  Dieu  pour  nous  conduire  et  pour  nous