52:180  totius  hominis  custodiam  et  omnium  eius  partium  ita  Deo  commendat  Paulus,  inde  colligendum  est,  nos  innumeris  periculis  esse  expositos,  nisi  illius  tutela  nos  protegeret.  24.  Fidelis  qui  vos  vocavit.  Sicuti  precando  testatus  est  quantam  de  salute  Thessalonicensium  curam  haberet:  ita  nunc  in  fiducia  divinae  gratiae  eos  confirmat.  Observa  autem  quo  argumento  perpetuum  illis  Dei  auxilium  promittat:  nempe  quia  eos  vocavit.  Quibus  verbis  significat,  sperandam  esse  gratiae  continuationem,  ex  quo  semel  Dominus  nos  sibi  in  filios  cooptavit.  Neque  enim  unius  diei  se  patrem  nobis  fore  pollicetur:  sed  hac  lege  nos  adoptat,  ut  perpetuo  nos  foveat.  Ergo  vocatio  testimonium  nobis  aeternae  gratiae  esse  debet  :  nam  opus  manuum  suarum  non  vult  mutilum  deserere.  Porro  fideles  alloquitur  Paulus,  qui  non  externa  modo  praedicatione  vocati  fuerant,  sed  efficaciter  fuerant  a  Christo  ad  patrem  adducti,  ut  essent  ex  filiorum  numero.  De  osculo,  ut  solenne  fuit  salutationis  symbolum,  alibi  dictum  est.  His  autem  verbis  suum  erga  sanctos  omnes  amorem  declarat.  27.  Adiuro  vos  per  Dominum.  Incertum  est  timueritne  (quod  saepe  accidit)  ne  maligni  ac  invidi  homines  epistolam  supprimerent:  an  aliud  praecavere  voluerit  periculum,  ne  perversa  quorundam  prudentia  et  cautione  contineretur  inter  paucos.  Semper  enim  reperiuntur  qui  negent  utile  esse  vulgari  quae  alioqui  optima  agnoscant.  Certe  quocunque  artificio  vel  praetextu  tunc  machinatus  fuerit  Satan  ne  in  omnium  notitiam  perveniret  epistola:  colligere  ex  Pauli  verbis  licet  quam  serio  et  acriter  se  opponat.  Neque  enim  res  levis  aut  frivola  est  adiuratio  per  Dei  nomen.  Habemus  itaque,  spiritum  Dei,  quae  Pauli  ministerio  in  hac  epistola  prodidit,  velle  toti  ecclesiae  publicari.  Unde  apparet,  diabolis  quoque  ipsis  praefractiores  esse  qui  a  lectione  scriptorum  Pauli  hodie  populum  Dei  arcent:  utpote  qui  tam  severo  exorcismo  non  moventur.