50:180  impulsum,  ipsos  quoque  propter  falsas  nebulonum  iactantias  Deo  opponere  necesse  habuit.  Ubi  autem  creatura  cum  Deo  confertur,  quamlibet  humilibus  atque  abiectis  titulis  deprimatur,  nulla  fit  ei  iniuria.  17.  Sed  abii  in  Arabiam.  Lucas  triennium  hoc  in  historia  Actorum  praeteriit:  quemadmodum  neque  alia  omnia  enumerat.  Ideo  frigida  est  eorum  calumnia,  qui  quaerunt  hic  aliquem  colorem  repugnantiae.  Caeterum  expendant  pii  lectores  quam  grave  tentationis  certamen  Paulum  statim  a  primo  tyrocinio  exceperit.  Qui  pridie  honoris  causa  cum  splendido  comitatu  missus  fuerat  Damascum,  nunc  profugus  in  aliena  terra  oberrare  cogitur:  neque  tamen  animo  deficit.  18.  Deinde  post  annos  tres.  Tertio  demum  anno  postquam  apostoli  munus  exercuerat,  conscendit  Ierosolymam:  ergo  non  auspicatus  est  ab  hominum  vocatione.  Et  tamen  ne  videretur  habere  separatas  ab  aliis  rationes,  ideoque  fugere  eorum  conspectum  :  dicit  se  hoc  consilio  venisse,  ut  Petrum  videret.  Ergo  tametsi  eorum  autoritatem  non  exspectaverat  in  suscipiendo  munere,  non  tamen  illis  invitis,  sed  consentientibus  et  approbantibus  gradum  apostolatus  tenuit.  Hoc  est  quod  intendit,  neque  se  unquam  fuisse  alienum  a  caeteris  apostolis,  et  sibi  etiamnum  bene  cum  illis  convenire.  Breve  tempus  notat  quod  illic  transegit,  ut  ostendat  se  non  discendi  causa  venisse,  sed  mutuae  duntaxat  communicationis.  Eodem  spectat  quod  addit,  se  neminem  alium  vidisse:  quia  scilicet  alio  tendens  iter  illac  faciebat  solum.  19.  Nisi  Iacobum.  Quis  hic  fuerit  Iacobus,  videndum  est.  Consentiunt  fere  veteres  unum  ex  discipulis  fuisse  cognomento  Oblian  et  Iustum,  qui  ecclesiae  Ierosolymitanae  praefuerit.  Quamquam  alii  Ioseph  filium  fuisse  putant  ex  alia  uxore:  alii  (quod  verisimilius  est)  Christi  ex  matertera  consobrinum:  sed  quum  hic  numeretur  inter  apostolos,  illam  opinionem  non  recipio.  Neque  enim  valet  excusatio  Hieronymi,  nomen  hoc  interdum  a  duodecim  ad  alios  transferri:  quando  hic  de  summa  dignitate  agitur:  et  eundem  paulo  post  habitum  fuisse  inter  praecipuas  columnas  audiemus.  Ergo  mihi  longe  probabilius  est,  Alphaei  esse  filium,  de  quo  loquitur.  Reliquos  per  varias  regiones  tunc  fuisse  sparsos  credibile  est:  non  enim  uno  in  loco  desidebant  otiosi.  Quamquam  autem  narrat  Lucas  deductum  ad  apostolos  fuisse  a  Barnaba:  non  tamen  de  duodecim  id  accipiendum,  sed  de  his  duobus,  qui  soli  tunc  erant  Ierosolymis.  20.  Porro  quae  scribo  vobis.  Haec  affirmatio  ad  totam  narrationem  extenditur.  Demonstrat  autem  quam  serio  de  hac  causa  Paulus  contenderit,  quod  iusiurandum  adhibet,  quo  uti  fas  non  est  nisi  in  causis  gravibus  magnique  momenti.  Neque  mirum