52:18  enim  hoc  melius.  24.  Manere  vero  in  carne  magis  necessarium  propter  vos.  25.  Atque  hoc  confisus  novi  quod  manebo  et  permanebo  cum  omnibus  vobis  in  vestrum  profectum  et  gaudium  fidei:  26.  ut  gloriatio  vestra  exsuperet  in  Christo  Iesu  de  me,  per  meum  rursus  adventum  ad  vos.  22.  Quod  si  vivere.  Quemadmodum  desperati  homines  perplexi  sunt  debeantne  vitam  longius  prorogare  in  miseriis,  an  morte  finire  suas  aerumnas:  ita  e  converso  Paulus  adeo  se  aequo  animo  tam  ad  mortem  quam  ad  vitam  paratum  esse  dicit,  quia  utriusque  conditio  beata  sit  fidelibus,  ut  de  optione  ambigat.  Si  operae  pretium  est,  hoc  est,  si  mihi  constet  maior  vitae  meae  fructus  quam  mortis:  non  video  utrum  debeam  praeoptare.  Vivere  in  carne  per  contemptum  posuit,  melioris  vitae  comparatione.  23.  Coarctor  enim.  Non  alia  mercede  vivere  optabat  Paulus,  quam  ut  serviret  Christi  gloriae  et  fratribus  prodesset.  Proinde  neque  aliam  utilitatem  reputat  in  vita  quam  fratrum  salutem.  Sibi  autem  privatim  melius  esse  agnoscit  cito  mori,  quia  futurus  sit  cum  Christo.  In  optione  vero  demonstrat  quanta  ardeat  caritate.  Non  hic  de  commodis  terrenis  agitur,  sed  de  spirituali  bono,  quod  merito  piis  summopere  optabile  est.  Paulus  tamen  quasi  sui  oblitus,  non  tantum  se  medium  continet,  ne  plus  in  suum  quam  Philippensium  bonum  propendeat:  sed  tandem  concludit,  ipsorum  rationem  in  corde  suo  praeponderare.  Hoc  scilicet  vere  est  Christo  vivere  et  mori,  quum  nobis  posthabitis  ferimur  quo  nos  Christus  vocat  ac  rapimur.  Cupiens  dissolvi  et  esse  cum  Christo.  Coniunctim  legenda  sunt  haec  duo.  Per  se  enim  mors  nunquam  expetetur,  quia  pugnat  hoc  desiderium  cum  sensu  naturae:  sed  expetitur  propter  causam,  vel  propter  alium  finem.  Desperati  ad  eam  confugiunt  taedio  vitae:  fideles  ad  eam  libenter  properant,  quia  liberatio  est  a  servitio  peccati  et  transitus  in  regnum  coelorum.  Hoc  est  quod  nunc  dicit  Paulus,  Cupio  mori,  quia  hoc  modo  perveniam  ad  Christi  coniunctionem.  Interea  non  desinunt  fideles  mortem  horrere  :  sed  quum  oculos  convertunt  ad  vitam  illam  quae  mortem  sequitur,  consolatione  ista  facile  vincunt  formidinem.  Certe  quisquis  in  Christum  credit,  ita  debet  esse  animatus,  ut  ad  mentionem  mortis  caput  attollat,  laetus  nuntio  suae  redemptionis.  Unde  apparet  quam  multi  sint  titulo  tenus  duntaxat  Christiani,  quando  maior  pars,  audito  mortis  nomine,  perinde  ac  si  nullum  unquam  de  Christo  verbulum  audissent,  non  modo  expavescunt,  sed  prope  redduntur  exanimes.  O  bona  conscientia,  quantum  polles  ac  vales!  Bonae  autem  conscientiae  fundamentum  est  fides:  imo  ipsa  est  conscientiae  bonitas.  Dissolvi.  Notanda  est  haec  loquutio.  Mortem  2