49:18  13.  Nolo  vos  ignorare.  Quod  hactenus  testatus  fuerat,  se  assidue  postulare  a  Domino,  ut  eos  aliquando  invisere  liceret:  id  quia  vanum  videri  poterat,  nisi  oblatas  occasiones  arriperet,  eius  nunc  fidem  facit.  Dicit  enim,  conatum  non  defuisse,  sed  facultatem  :  quia  a  captato  saepe  consilio  impeditus  fuerit.  Unde  discimus,  Dominum  evertere  frequenter  sanctorum  consilia,  quo  ipsos  humiliet,  ac  tali  humiliatione  exerceat  ad  providentiam  suam  respiciendam,  ut  ex  ea  pendeant  Quamquam  non  proprie  depeliuntur  sancti  suis  consiliis,  qui  nihil  sine  Domini  voluntate  deliberant.  Est  enim  illa  impietatis  audacia,  praeterito  Deo,  de  futuris  constituere,  perinde  ac  si  in  nostra  potestate  forent:  quam  aspere  castigat  Iacobus  (4,  13).  Quod  se  p  r  o  h  i  -  b  i  t  um  dicit,  non  aliter  accipias  nisi  quia  Dominus  urgentiora  negotia  illi  obiiciebat,  quae  omittere  non  poterat  sine  ecclesiae  iactura.  Sic  piorum  et  infidelium  impedimenta  differunt:  quod  hi  se  tum  impediri  demum  sentiunt  quando  violenta  Domini  manu  constringuntur  ne  commovere  se  queant:  illi  ad  impedimentum  contenti  sunt  legitima  ratione,  nec  aliquid  tentare  sibi  permittunt  aut  praeter  officium,  aut  contra  aedificationem.  Ut  fructum  aliquem  haberem.  Nimirum  de  eo  fructu  loquitur  ad  quem  colligendum  apostolos  mittebat  Dominus:  Elegi  vos,  ut  eatis,  et  fructum  afferatis,  et  fructus  vester  maneat  (Iohan.  15,  16).  Eum  quamquam  sibi  non  colligebat,  sed  Domino,  suum  tamen  vocat:  quia  nihil  piorum  magis  proprium  quam  quod  Domini  gloriam  promovet,  cum  qua  coniuncta  est  tota  eorum  beatitudo.  Sibi  autem  contigisse  inter  caeteras  gentes  commemorat,  quo  spem  concipiant  Romani,  adventum  eius  sibi  non  fore  otiosum,  quem  tot  gentes  fructuosum  expertae  essent.  14.  Graecis  et  Barbaris,  et  sapientibus.  Quos  per  Graecos  et  Barbaros  intelligat,  ostendit  exegesi:  ubi  nominat  eosdem  aliis  epithetis  sapientes  et  stultos:  pro  quibus  non  male  vertit  Erasmus,  eruditos  et  rudes  :  sed  ego  ipsa  Pauli  verba  retinere  malui.  Ab  officio  itaque  suo  argumentatur,  non  esse  sibi  arrogantiae  dandum  quod  aliquid  docendis  Romanis  se  valere  confideret,  utcunque  et  eruditione  et  prudentia  et  peritia  rerum  egregie  excellerent:  quoniam  Domino  visum  esset  ipsum  sapientibus  quoque  obligare.  Duo  hic  sunt  consideranda:  sapientibus  coelesti  mandato  destinari  et  offerri  evangelium,  quo  sibi  omnem  huius  mundi  sapientiam  subiiciat  Dominus,  ac  omne  acumen,  quodvis  scientiae  genus  et  artium  omnium  sublimitatem,  huius  doctrinae  simplicitati  cedere  faciat:  atque  eo  magis  quod  illi  in  ordinem  cum  idiotis  rediguntur,  ac  sic  mansuefiunt  ut  eos  ferant  condiscipulos  sub  magistro  Christo,  quos  antea  habere  discipulos  non  essent  dignati.