47:18  nos  gratias  cumulat  Deus,  peraeque  ex  hoc  fonte  manare.  Posset  etiam  accipi  quasi  nota  finalis  causae,  nos  gratiam  nunc  accipere,  ut  aliquando  Deus  opus  salutis  nostrae  compleat,  quod  erit  gratiae  complementum.  Ego  tamen  eorum  sententiae  potius  subscribo,  qui  nos  irrigari  dicunt  effusis  in  Christum  gratiis.  Quod  enim  a  Christo  accipimus,  non  modo  tanquam  Deus  nobis  largitur,  sed  pater  in  eum  contulit,  quod  tanquam  per  canalem  ad  nos  manaret.  Haec  est  unctio,  qua  delibutus  fuit,  ut  nos  secum  omnes  ungeret.  Unde  et  ille  Christus  vocatur,  nos  Christiani.  17.  Quia  lex  per  Mosen.  Est  prolepsis,  in  qua  praevenit  contrariam  exceptionem.  Tanti  enim  erat  apud  Iudaeos  Moses,  ut  aegre  quidquam  ab  eo  diversum  admitterent.  Docet  ergo  evangelista,  quanto  inferius  fuerit  Mosis  ministerium  Christi  potestate.  Simul  comparatio  haec  Christi  virtutem  non  parum  illustrat.  Nam  quum  Mosi  nihil  non  deferrent  Iudaei,  admonet  evangelista  perquam  exiguum  esse  quod  ille  attulit,  si  cum  Christi  gratia  conferatur.  Erat  enim  alioqui  magnum  obstaculum,  quod  se  ex  lege  habere  putabant,  quae  nonnisi  per  Christum  consequimur.  Caeterum  notanda  est  antithesis,  quum  legem  opponit  gratiae  et  veritati,  nam  utrumque  horum  legi  defuisse  significat.  Veritas  autem  meo  iudicio  pro  firma  et  solida  rerum  stabilitate  capitur.  Per  nomen  gratiae  spirituale  eorum  complementum  intelligo,  quorum  nuda  littera  in  lege  continebatur.  Ac  possunt  duae  istae  voces  per  hypallagen  eodem  referri:  ac  si  dixisset  gratiam,  qua  constat  legis  veritas,  in  Christo  demum  exhibitam  fuisse.  Verum  quia  idem  manebit  sensus,  connectasne  an  distinguas,  parum  interest.  Hoc  quidem  certum  est,  evangelistam  velle,  in  lege  adumbratam  duntaxat  fuisse  spiritualium  bonorum  imaginem  :  in  Christo  vero  solide  praestari:  unde  sequitur,  si  legem  a  Christo  separes,  nihil  illic  restare  praeter  inanes  figuras.  Qua  ratione  dicit  Paulus  ad  Coloss.  2,  17  illic  esse  umbras,  in  Christo  corpus.  Neque  tamen  imaginandum  est  quidquam  fallaciter  in  lege  fuisse  ostensum:  Christus  enim  anima  est  quae  vivificat  quod  alioqui  esset  in  lege  mortuum.  Sed  hic  aliud  agitur,  quid  scilicet  lex  per  se  et  absque  Christo  valeat:  negat  autem  evangelista,  quidquam  in  ea  solidum  inveniri,  donec  ad  Christum  ventum  fuerit.  Porro  veritas  haec  in  eo  consistit,  quod  per  Christum  obtinemus  gratiam,  quam  lex  minime  potuit  conferre.  Itaque  gratiae  nomen  generaliter  accipio,  tam  pro  gratuita  peccatorum  remissione,  quam  pro  renovatione  cordis.  Nam  quum  hic  discrimen  veteris  et  novi  testamenti  breviter  notet  evangelista  (quod  fusius  describitur  Ierem.  31  v.  31),  quidquid  ad  spiritualem  iustitiam  spectat,  hoc  verbo  complectitur.  Eius  autem  duae  sunt  partes,  quod  gratis  se  nobis  Deus  reconciliat,  peccata  non  imputando:  2