43:18  more,  quia  ubi  locus  aliquis  obscurus  occurrit,  statim  comminiscuntur  fabulam:  etiamsi  nulla  historia  constet,  tamen  exercent  suum  ingenium  in  illis  fabulosis  commentis.  Hoc  etiam  mihi  displicet:  sed  interim  quid  opus  est  confugere  ad  allegoriam,  quum  simpliciter  accipere  liceat  quod  propheta  dicit,  nempe  exustum  fuisse  cadaver  regis  Edom.  Neque  enim  dubito  quin  propheta  barbaram  crudelitatem  accuset  in  Moabitis.  Effodere  cadavera  hostium,  et  ossa  exurere,  hoc  immane  est  facinus,  et  prorsus  barbarum.  Fuit  autem  magis  detestabile  in  Moabitis,  quibus  aliqua  erat  cognatio  cum  populo  Edom:  descenderant  enim  ex  eodem  genere:  et  debebat  etiam  vigere  memoria  illius  propinquitatis,  quoniam  Abraham  aluerat  Loth  patrem  Moabitarum:  et  ideo  obstricti  erant  Moabitae  Idumaeis.  Si  qua  igitur  viguisset  apud  eos  humanitas,  debebant  cohibere  suos  affectus,  ne  tam  hostiliter  pugnarent  cum  fratribus  suis.  Nunc  quum  excedunt  omnem  rationem  belli,  et  saeviunt  in  ipsa  cadavera,  ossa  mortuorum  exurunt,  hoc  certe  nimis  est  barbarum  quemadmodum  dixi.  Summa  igitur  est,  Moabitas  iam  non  posse  ferri,  quia  in  hoc  uno  facto  specimen  praebuerint  truculentiae  quasi  ferinae.  Nam  si  gutta  ulla  humanitatis  in  illis  fuisset,  mitius  tractassent  fratres  suos  Idumaeos:  nunc  autem  exurunt  ossa  regis  in  calcem,  id  est,  in  cinerem  ossa  regis  Edom:  hinc  certe  apparet  illos  oblitos  fuisse  omnis  humanitatis,  et  aequitatis.  Nunc  tenemus  genuinum  prophetae  sensum.  Addit  igitur  comminationem.  Mittam  ignem  in  Moab,  qui  vorabit  palatia  DTHp.  Diximus  quid  propheta  sibi  velit  per  has  loquendi  formas,  quod  scilicet  Deus  violenta  poena  consumet  Moabitas  quasi  incendio,  nec  posse  obstare  munita  eorum  loca,  quin  vindictam  suam  exsequatur:  quia  si  palatiis  suis  superbiant,  hoc  tamen  nihil  ipsis  proderit.  Adiungit  etiam,  Morietur  Moab  in  tumultu,  in  strepitu,  in  clangore  tubae:  hoc  est,  ego  accersam  hostes  robustos  qui  pervadant,  et  non  paciscantur  cum  Moabitis,  sed  occupent  loca  omnia  et  urbes  munitas  vi  et  gladio.  Hoc  enim  intelligit  propheta  per  tumultum,  per  strepitum,  per  clangorem  tubae,  quod  scilicet  non  venient  in  potestatem  hostium  Moabitae  certis  legibus  et  pactis,  quemadmodum  deditio  voluntaria  mitigare  solet  hostilis  saevitiae  rigorem:  hoc  non  fiet,  inquit,  quia  hostes  potientur  non  opibus  modo  ipsorum,  sed  etiam  ipsa  vita.  Tandem  adiungit,  et  excidam  iudicem  e  medio  eius,  et  occidam  principes  eius,  dicit  Iehova.  Deus  hic  pronuntiat  nullum  fore  amplius  regnum  Moabitarum,  et  nullum  populi  corpus.  Scimus  enim  non  posse  consistere  homines  sine  aliquo  ordine  politico.  Ergo  ubi  est  aliquis  conventus  hominum,  illic  necesse  est  esse  principes  qui  alios  gubernent  et  moderentur.  Quum  igitur  pronuntiat  Deus  nullum  amplius  fore  iudicem  in  Moabitis,  tantundem  hoc  valet  ac  si  diceret  2