42:18  meurtres,  et  les  vengeances,  car  il  est  vray  que  la  royne  Laodice,  et  ses  deux  enfans  pensent  bien  eschapper  d'avoir  empoisonne  le  roy,  et  tue  sa  femme,  et  son  enfant,  mais  quoy?  Nous  voions  que  Dieu  ne  permet  point  que  cela  demeure  impuni:  il  est  vray  que  Ptolomee  (qui  se  nommoit  bien-faicteur)  ha  este  esmeu  d'une  passion  charnelle,  quand  il  ha  voulu  venger  la  mort  de  sa  soeur,  et  l'opprobre  qui  avoit  este  fait  a  sa  maison,  mais  ceci  n'advint  pas  sans  la  providence  de  Dieu,  il  nous  faut  tousiours  revenir  a  cette  escriture  de  verite,  d'ont  il  ha  este  fait  mention  ci  dessus,  que  Dieu  avoit  toutes  ces  choses  en  son  conseil,  que  devant  que  ce  roy  fust  ne  ne  conceu,  Dieu  avoit  desia  ordonne  ce  qu'il  devoit  faire  par  sa  main,  c'est  a  scavoir,  punition  sur  de  tels  meurtres  et  de  tels  malefices.  Dieu  donc  ne  vouloit  point  que  cela  demourast  impuni,  et  voila  pourquoy  cette  guerre  ha  este  esmeue.  Nous  verrons  bien  les  hommes  qui  se  ietteront  aux  champs  selon  leurs  appetits  et  sensualites,  mais  cependant  il  y  ha  un  Dieu  qui  gouverne  par  dessus  a  sa  facon,  c'est  a  dire  d'une  telle  droiture,  et  equite,  que  nous  aurons  tousiours  occasion  de  le  louer  et  magnifier.  Si  nous  regardons  d'un  coste  le  roy  de  Syrie,  et  de  l'autre  coste  le  roy  d'Egypte,  nous  trouverons  qu'il  n'y  ha  que  malice,  que  trahison  et  desioiaute  en  eux,  et  le  meilleur  qui  y  sera,  encores  ne  meritera-il  point  d'estre  estime,  vray  est  qu'il  n'est  question  que  de  se  venger  l'un  de  l'autre,  il  y  ha  cette  avarice,  et  cette  ambition  qui  les  transporte,  mais  si  est-ce  que  par  cela  Dieu  punist  les  peches  qui  avoient  este  commis,  et  beaucoup  d'enormites,  et  non  seulement  sur  leurs  personnes,  mais  sur  tout  le  pays  et  les  peuples  qui  leur  estoient  suiets.  Si  on  demande,  et  qu'est-ce  que  les  peuples  ont  offense?  or  remettons  cela  a  Dieu,  car  s'il  permet  que  ses  verges  s'estendent  pour  chastier  les  roys,  neantmoins  il  aura  tousiours  iuste  raison  pour  punir  leurs  suiets,  et  nul  ne  sera  innocent  quand  tous  seront  consideres  en  ce  qu'ils  ont  merite.  Ainsi  donc  voila  comment  il  nous  faut  revenir  a  ce  iugement  de  Dieu  (que  nul  ne  peut  eviter),  a  fin  que  quand  nous  aurons  offence  nostre  Dieu,  que  nous  sachions  que  si  maintenant  nous  ne  sentons  pas  les  coups  de  sa  main,  et  que  nous  n'appercevions  point  qu'il  nous  veuille  frapper,  que  neantmoins  nous  sentirons  a  la  fin  que  c'est  a  bon  escient  qu'il  s'est  declare  nostre  iuge:  II  n'y  ha  donc  autre  remede  sinon  de  le  supplier,  qu'il  luy  plaise  de  nous  recevoir  a  merci,  quand  il  aura  desia  son  arc  tendu,  qu'il  luy  plaise  nous  pardonner  nos  fautes  et  nos  peches.  Voila  comme  nous  aurons  occasion  de  nous  humilier  devant  Dieu,  voians  les  punitions  qu'il  aura  ainsi  faites.  Et  au  reste  quand  il  est  parle  des  dieux  d'or,  2