41:18  Daniel,  regem  ita  loquutum  fuisse  secum,  Deus  tuus,  cui  tu  inservis  iugiter,  vel  quem  tu  colis  iugiter,  ipse  te  eripiet.  Potest  hoc  verbum  legi  in  modo  optativo,  ut  dictum  fuit.  Neque  dubium  est  quin  tale  votum  conceperit  Darius  :  sed  potest  etiam  ita  accipi,  Deus  tuus  quem  colis  te  eripiet:  ac  si  diceret,  Iam  non  sum  mei  iuris:  ego  hic  rapior  quasi  tempestatis  impetu  :  proceres  me  invitum  compellunt  ad  hoc  facinus.  Ego  igitur  nunc  te  resigno  et  vitam  tuam  Deo,  quia  non  meum  est  te  eripere:  quasi  hac  excusatione  levaret  crimen  suum,  ubi  transfert  potentiam  servandi  Danielis  ad  Deum.  Haec  ratio  quosdam  movit,  ut  laudarent  pietatem  regis  Darii:  sed  ut  ego  fateor  in  hoc  sermone  nobis  ostendi  eius  clementiam  et  humanitatem:  ita  certum  est,  ne  micam  quidem  pietatis  in  eo  fuisse,  quum  ita  se  ornare  voluit  spoliis  Dei.  Nam  superstitiosi  etiamsi  non  timeant  serio  Deum,  retinentur  tamen  aliquo  eius  metu:  hic  autem  voluit  in  nihilum  redigere  omnem  divinitatem.  Qualis  fuit  haec  pietas?  Laudanda  igitur  est  clementia  in  Dario:  sed  sacrilega  eius  superbia  nullo  modo  excusabilis  est.  Deinde,  cur  ita  humaniter  se  gessit  erga  Danielem?  Quia  fidelem  ministrum  expertus  erat.  Fuit  igitur  peculiaris  amor,  qui  flexit  eum  ad  clementiam.  Non  servasset  eundem  tenorem  apud  alios,  si  centum  vel  mille  Iudaei  tracti  fuissent  in  iudicium,  secure  omnes  damnasset,  quod  non  gessissent  morem  edicto.  Ergo  fuisset  illic  pertinaciter  et  impius  et  crudelis.  Parcit  autem  Danieli  ob  suum  privatum  commodum:  deinde  quia  amplexus  illum  fuerat  suo  favore.  Caeterum  ut  laudetur  eius  humanitas,  nullum  apparet  signum  pietatis  in  eo.  Dicit  tamen,  Deus  tuus  quem  colis,  ipse  te  eripiet,  nempe  quia  prius  cognoverat  Danielem  vaticinatum  esse  de  interitu  monarchiae  chaldaicae:  hinc  convincitur,  Deum  Israelis  esse  praescium  rerum  omnium:  deinde  omnia  subesse  eius  arbitrio.  Sed  interim  neque  ipsum  colit,  neque  etiam  patitur  ab  aliis  coli.  Excluserat  enim  Deum  suo  iure,  quantum  in  ipso  fuerat.  Quamvis  ergo  hic  tribuat  Deo  potentiam  liberandi,  non  facit  ex  animo:  deinde  etiamsi  faciat,  eo  deterior  est  eius  impietas,  ubi  eum  quem  sentit  verum  et  unicum  Deum,  et  praeditum  summa  potestate,  privat  tamen  iure  suo:  et  quum  sit  cinis  et  terra,  audet  se  substituere  in  eius  locum.  Nunc  sequitur,  17.  Et  adductus  fuit  lapis  unus  et  positus  super  os  speluncae:  et  obsignavit  eum  rex  annulo  suo  et  annulo  procerum  suorum,  ne  mutaretur  placitum  in  Daniele  (hoc  est,  quantum  ad  Danielem:  qui  reddunt,  Contra,  ac  si  rex  consulto  obviam  ire  voluisset  eorum  violentiae,  pervertunt  totum  sensum  :  quando  haud  dubie  illorum  instigatione  id  factum  est,  ne  rex  curaret  furtim  educi).  2