39:18  usque  ad  genus,  et  postquam  expendit  Dei  potentiam  et  bonitatem  in  populi  redemptione,  mentem  suam  extendat  in  omnes  mundi  partes,  et  miracula  Dei  ubique  consideret.  Et  haec  ratio  saepe  occurrit  in  scripturis,  dum  scilicet  admoniti  aliquo  exemplo  divinae  virtutis  aut  gratiae  rapimur  et  transcendimus  ad  generalem  considerationem.  Ut  faceres  tibi,  vel  acquireres  tibi,  nomen  secundum  diem  hunc,  hoc  est,  ut  nomen  tuum  esset  perpetuum,  quemadmodum  adhuc  hodie  splendor  ipse  nobis  ante  oculos  versatur.  Significat  igitur  propheta  Deum  tam  potenter  monstrasse  suam  virtutem,  ut  eius  cognitio  perpetua  sit,  neque  possit  unquam  sepeliri  hominum  ingratitudine.  21.  Et  eduxisti  populum  tuum  Israel  e  terra  Aegypti  in  signis  et  portentis,  et  in  manu  robusta,  et  in  brachio  extento,  et  in  terrore  magno.  Nunc  propius  ad  causam  ipsam  accedit  Ieremias,  postquam  enim  praefatus  est  de  inaestimabili  Dei  potentia,  nunc  commendat  iustum  eius  iudicium,  quod  poenas  exigere  statuerit  de  impio  et  scelerato  populo.  In  hunc  finem  commemorat  redemptionis  beneficium:  deinde  adiungit,  terram  fuisse  datam  Israelitis,  quae  olim  patribus  eorum  fuerat  promissa.  Postea  subiicit  beneficium  hoc  fuisse  locatum  apud  ingratos,  quia  statim  excusserint  iugum  et  contempserint  Deum  redemptorem  una  cum  eius  lege.  Dicit  igitur  populum  fuisse  eductum  e  terra  Aegypti  cum  signis  et  portentis.  Hoc  ad  amplificationem  pertinet,  quia  Deus  insolitis  modis  satis  testatum  fecit  non  nisi  sua  gratia  populum  potuisse  eripi  ex  Aegypto.  Nam  si  non  fuisset  conspicua  Dei  virtus  in  miraculis  et  portentis,  poterant  Israelitae  transferre  Dei  gratiam  ad  ipsos,  vel  terrena  media,  sed  ita  resplenduit  gratia  Dei  in  signis  et  prodigiis,  ut  non  potuerit  liberatio  populi  vel  fortunae,  vel  hominum  industriae,  vel  ullis  mediis  adscribi.  Et  eodem  sensu  adiungit  manum  robustam,  et  brachium  extentum.  Significat  his  verbis  sic  liberatum  fuisse  populum,  ut  palam  apparuerit  manus  Dei,  imo  brachium  extentum,  hoc  est,  virtus  quae  longe  et  late  sese  extendit,  quemadmodum  hanc  similitudinem  alibi  exposuimus.  Postremo  adiungit  terrorem  magnum,  quia  scilicet  tanta  erat  hostium  superbia,  ut  nunquam  passuri  fuerint  populum  exire,  nisi  magnus  terror  fuisset  iniectus.  Quoniam  ergo  subacti  fuerunt  Aegyptii  terrore,  ideo  amplificat  etiam  hac  circumstantia  Ieremias  gratiam  redemptionis:  quasi  diceret  non  esse  obscuram  Dei  gratiam,  quia  insignibus  documentis  cognoverint  Israelitae  divinitus  se  eripi.  Tanta  enim  erat  hostium  et  potentia,  et  audacia,  et  crudelitas,  ut  nulla  esset  spes  liberi  exitus,  nisi  Deus  manum  suam  e  coelo  exsereret.  Postea  sequitur,  2