30:179  179  HOMILIA  LIX.  180  sive  bonos,  sive  malos.  Deus  enim  saepe  diabolis  ut  instrumentis  utitur  ad  filios  suos  et  populum  suum  castigandum.  Istud  ex  historia  Iobi  conspicuum  est,  quis  enim  illum  bonis  omnibus  et  facultatibus  spoliavit?  quis  pecudes  et  servos  ipsius  igne  coelitus  immisso  consumpsit?  Quis  domum  cum  liberis  ipsius  una  edentibus  ventis  ingentibus  excitatis  evertit?  quis  ad  tantam  miseriam  reduxit,  ut  tanquam  miserum  cadaver  in  stercore  volutaretur?  Multi  quidem  improbi  homines  suam  hic  operam  locarunt,  sed  omnium  malorum  istorum  auctorem  fuisse  diabolum  scimus,  facta  ipsi  prius  a  Domino  potestate:  quam  alioquin  a  se  non  habuisset.  Verum  licet  a  diabolo  multis  persequutionibus  urgeamur,  non  permittit  tamen  Dominus  illas  esse  nobis  noxias,  sed  potius  in  misericordiam  et  salutem  nostram  convertet.  Sic  diabolo  quidem  factam  potestatem  videmus  Iobum  affligendi  et  multis  calamitatibus  urgendi  et  premendi:  sed  non  opprimendi.  Neque  enim  vitam  et  animam  ipsius  attingendi  potestatem  habuit,  sed  intra  praefixos  terminos  a  Domino  manere  debuit.  Et  quidem  apparet,  licet  affligamur  a  Deo  ad  nos  humiliandos,  et  idcirco  diabolo  permittat  in  nos  aliquam  potestatem,  non  ideo  tamen  licere  illi  quodcunque  volet,  neque  exitiosas  fore  afflictiones  et  calamitates  quascunque  tandem  immiserit.  Immo  potius,  quod  longe  maius  est,  eas  nobis  in  bonum  cessuras  certum  est,  vel  ex  ipsa  Pauli  primae  ad  Corinthios  epistola  cap.  5,  ubi  quum  in  scortatores  invectus  esset,  qui  suis  flagitiis  veluti  indormiebant,  et  nominatim  quum  incestuosum  Satanae  tradidisset,  ait  hoc  fieri  ad  interitum  carnis,  ut  spiritus  salvus  sit  die  Domini  Iesu.  Ergone  Paulum  dicemus  eos  quos  exsecrationi  et  anathemati  devovit,  et  ab  ecclesia  reiecit,  in  condemnationem  et  exitium  eiecisse?  Nequaquam  sane:  sed  illos  oportuit  in  carne  sic  ab  ipso  castigari,  nimirum  ad  tempus,  ut  ad  poenitentiam  in  animae  salutem  ipsos  incitaret.  Profecto  et  ipsum  Paulum  conspicimus  diaboli  persequutioni  obnoxium,  et  eam  fuisse  a  Domino  datam  ipsi  veluti  quandam  admonitionem  et  correptionem.  Summo  enim  ipsius  bono  factum  est,  ut  istis  modis  exerceretur,  ne  nimirum  propter  donorum  Dei  abundantiam  insolesceret  et  efferretur,  atque  ita  magnum  impedimentum  in  muneris  exsequutione  fideli  ipsi  obiiceretur:  quamobrem  non  aliter  potuit  Paulus  ab  arrogantia  tutus  esse,  nisi  hoc  velut  amuleto  et  protreptico  pharmaco.  Denique  Deo  visum  est  ita  Paulum  exercere  in  ipsius  summam  utilitatem.  Quare  quotiescunque  Deo  videbitur,  nos  quibuscunque  modis  ipsi  placuerit  exercere,  licet  instrumentis  utatur  ad  nos  corrigendos  incredulis  et  contemptoribus  verbi  sui,  imo  et  diabolis  ipsis,  nos  eo  usque  deprimi  deiicique  par  est,  ut  quoniam  ab  Adamo  primo  parente  ortum  ducimus,  iam  infecto  a  peccato,  scia-