10.1:179  DE  MUTATA  AUT  MUTANDA  RELIGIONE.  EPISTOLA  CUIUSDAM  NOMINE  SCRIPTA,  QUI  SE  A  PATRE  RELIGIONIS  NOMINE  SUBDUXERAT.  *)  Quod  facti  mei  rationem  scripto  et  absens  potius  quam  praesens  exhibeo,  peto  a  te,  observande  pater,  ut  me  excusatum  habeas.  Duo  in  causa  sunt:  unum,  quod  veritus  sim,  ut  in  re  odiosa  et  in  speciem  aliena,  satis  facilem  ad  me  audiendum  te  haberem:  alterum,  quod  summa  illa  reverentia  qua  te  prosequor,  mihi  apud  te  quidquam  istorum  proferre  hactenus  non  permiserit.  Nunc  vero  ineundam  mihi  hanc  rationem  esse  duxi,  qua  vel  te  placarem,  quatenus  offensionem  de  me  conceptam  retineres,  vel  saltem  quidquid  istud  est  emollirem,  dum  oblata  meliori  occasione  tibi  ad  plenum  satisfacerem.  Dolet  tibi,  quod  in  cultus  Dei  ratione  quem  pro  vera  habes  te  non  sequar.  Hoc  si  contemptu  facerem,  ut  leves  multi  homines,  quibus  susque  deque  est  omnis  religio,  quique  omni  affectu  in  cultus  Dei  observatione  vacui  sunt,  nulla  venia  non  essem  indignissimus.  Sin  vero  Dei  timor,  et  conscientiae  testimonium  eo  me  impulerunt,  sic  mihi  persuadeo,  utroque  illo  nomine  meum  a  te  factum  tolerabilius  iudicatum  iri.  Iam  ne  te  multis  obtundam,  negari  hoc  non  potest,  quin  multi  et  crassi  abusus  et  corruptelae  in  ecclesia  locum  habeant,  qui  Dei  nomine  teguntur:  et  bona  intentio  ista  omnia  eluere  creditur.  Interea  qui  sic  vivunt,  ut  sine  Dei  voluntatis  autoritate  Deo  sese  approbatum  iri  statuant,  illi  (ut  vulgo  dicitur)  rationem  suam  sine  hospite  subducunt.  Siquidem  fixum  esse  illud  debet,  Deum  non  ex  nostro  sed  ex  ipsius  arbitrio  colendum  esse.  Me  vero  ferendum  non  esse  fateor,  si  his  de  rebus  ex  meo  sensu  pronunciare  audeam,  quasi  aliis  iudicio  plus  valeam.  Sed  non  hic  agitur  quis  melius  sapiat  inter  homines:  illa  enim  regula  et  nota  est,  et  1)  Beza  exhibet  inter  epistolas,  e  gallico  versam  dicens  Gen.  p.  143,  Laus.  p.  317,  Han.  p.  354,  Chouet  p.  194,  Amst.  p.  88.