30:178  malum  Saulem  exagitare:  quae  duae  loquendi  phrases  insolentes  videntur  et  blasphemae,  sibique  ipsis  contrariae,  quum  uno  loco  dicatur  spiritus  malus  a  Domino:  alio  vero,  spiritus  malus  Domini.  Sed  nulla  in  istis  blasphemia,  nulla  repugnantia  esse  cognoscetur,  si  animadverterimus  quae  sit  Domini  potentia  in  diabolos  et  in  omnes  ipsorum  conatus,  ac  rabiem  et  furorem  ipsorum.  Nae  si  Deo  sic  inimicos  et  reluctantes  diabolos  arbitraremur,  ut  non  coerceret  illos  suo  imperio,  summam  ipsis  dominationem  et  imperium  adscriberemus,  et  quod  Dei  unius  proprium  est  tribueremus,  non  sine  ingenti  et  detestanda  blasphemia.  Quare  tenendum  est  diabolos  ita  Deo  subiectos  esse,  ut  sine  ipsius  permissu  nihil  movere  possint  :  et  licet  malitia  sua  et  vitio  depravati  corruptique  sint,  tamen  Deo  inservire,  quorum  opera  pro  suae  voluntatis  utatur  arbitrio,  ut  nihil  conari  sine  ipsius  permissu  possint.  Ac  licet  proprio  furore  contra  Dei  voluntatem  ferantur,  eiusque  gloriam  obscurare  nitantur,  iustitiamque  corrumpere  et  inanem  reddere:  non  tamen  voluntatem  perficere  posse,  neque  etiam  sese  movere,  nisi  quantum  et  quatenus  illis  divina  permittit  potentia.  Quapropter  diligenter  est  haec  doctrina  meditanda  et  animis  nostris  infigenda,  sine  qua  Dei  maiestas  et  gloria  non  subsisteret:  nempe  diabolos  esse  ita  Domino  subditos,  ut  vel  invitos  ipsi  inservire  oporteat,  et  licet  reluctantes,  eius  tamen  voluntatem  et  decretum  perficere.  Ac  sane  quidquid  diaboli  adversum  nos  potestatis  habent  in  eo  positum  est  ut  nos  cladibus  multis  flagellent,  unde  quaecunque  adversa  patimur,  flagella  nominantur.  An  vero  diabolorum  ea  est  potestas,  ut  nos  tanquam  suas  creaturas  et  sibi  subditos  puniant?  Profecto  misera  hominum,  si  se  res  ita  haberet,  conditio  esset.  Scriptura  igitur  voce  illa  spiritus  mali  a  Domino,  vel  Domini,  utitur,  ut  ostendat  Deum  illis  tanquam  flagellis  uti  ad  nostrarum  transgressionum  coercitionem.  Quare  quum  a  diabolis  affligimur,  ne  existimemus  Domini  manum  non  esse  superiorem;  sed  sciamus  potius  diabolos  esse  tanquam  flagella,  quibus  ad  nos  feriendos  Deus  utitur.  Sic  ergo  dicitur  a  Domino  fuisse  spiritus  ille  malus  qui  Saulem  exagitavit,  et  postea,  fuisse  spiritus  malus  Domini:  non  quod  a  Deo  malum  processerit:  sed  quod  diaboli,  suam  licet  in  se  malitiam  contineant,  inviti  tamen  tam  arctis  habenis  a  Deo  coercentur,  ut  ipsi  inserviant,  et  ipsis  ad  homines  flagellandos  et  castigandos  utatur.  Sane  quum  de  Deo  qualis  in  se  est  loquimur,  sciendum  est  illum  solum  suum  in  se  spiritum  habere,  quemadmodum  Paulus  ait  1.  Corinth.  12  donorum  Dei  esse  varietatem,  sed  unum  et  eundem  spiritum,  efficientem  omnia  in  omnibus.  Sed  quum  de  malo  spiritu,  diabolos  intelligamus  natura  sua  corruptos,  qui  tamen  a  Domino  mittuntur,  ad  eos  quos  voluerit  affligendos,  12