29:178  donc  en  somme  ce  que  nous  avons  a  retenir  de  ce  passage.  Or  notamment  il  est  parle  des  sacrifices  de  iustice,  pour  monstrer  que  Dieu  mesmes  du  temps  des  ombres  et  figures  n'a  point  voulu  estre  servi  seulement  par  mines,  mais  qu'il  vouloit  qu'on  y  vinst  en  verite  et  en  droicture:  car  l'hypocrisie  luy  a  tousiours  este  detestable.  Il  est  vray  que  les  Peres  anciens  ont  eu  ceste  diversite  d'avec  nous,  que  quand  ils  adoroyent  Dieu,  il  falloit  adiouster  les  sacrifices,  il  y  avoit  les  luminaires,  il  y  avoit  beaucoup  d'autres  pompes:  et  bien,  tout  cela  est  auiourd'huy  abattu:  mais  tant  y  a  que  de  tout  temps  Dieu  a  voulu  qu'on  se  presentast  a  luy  en  purete  de  coeur:  comme  il  est  dit  en  Ieremie,  Seigneur,  tes  yeux  regardent  la  droicture.  Et  ainsi,  ne  pensons  point  que  Dieu  ait  iamais  prins  plaisir  a  toutes  ces  choses  externes  dont  il  est  parle  en  la  Loy:  car  il  les  a  commandees  a  cause  des  hommes:  ce  n'estoit  point  au  regard  de  soy,  mais  c'estoit  pour  entretenir  ce  peuple  qui  estoit  encores  semblable  a  des  petis  enfans,  iusques  a  la  venue  de  nostre  Seigneur  Iesus  Christ.  Or  puis  que  sous  la  Loy  et  les  ceremonies  Dieu  a  voulu  estre  servi  en  verite:  maintenant  que  son  service  est  du  tout  spirituel,  comme  nostre  Seigneur  Iesus  le  declare  au  quatriesme  chapitre  de  sainct  Iean,  quand  il  dit  a  la  Samaritaine,  que  Dieu  ne  veut  plus  avoir  ce  qui  estoit  requis  sous  la  Loy,  mais  qu'il  veut  du  tout  estre  servi  en  esprit  et  verite:  cognoissons  que  pour  le  servir  deuement,  il  ne  faut  point  que  nous  ayons  beaucoup  de  menus  fatras  devant  les  hommes,  que  nous  luy  cuidions  complaire  par  nos  agios:  mais  que  nous  luy  offrions  sacrifices  de  iustice.  Or  c'est  une  doctrine  par  trop  corrompue  au  monde.  Car  nous  voyons  ce  qu'on  appelle  auiourd'huy  communement  service  de  Dieu  :  ie  laisse  que,  ce  que  font  les  Papistes,  ce  ne  sont  qu'inventions  humaines,  que  la  il  n'y  a  point  une  seule  syllable  de  la  parolle  de  Dieu:  mais  encores  prenons  le  cas  que  Dieu  acceptast  les  choses  qu'ils  font,  si  est-ce  qu'encores  ne  vallent-elles  rien,  pource  qu'il  n'y  a  qu'un  mespris  de  Dieu  et  hypocrisie  :  quand  les  Papistes  auront  bien  barbotte,  qu'ils  auront  trotte  en  voyage,  qu'ils  auront  allume  du  luminaire,  qu'ils  auront  pare  leurs  marmousets  et  idoles,  il  leur  semble  que  Dieu  soit  bien  paye.  Et  pourquoy?  Car  ils  le  transfigurent  par  leurs  resveries,  et  leur  semble  qu'ils  le  serviront  a  leur  guise  et  a  leur  poste.  Nous  voyons  donc  comme  le  povre  monde  est  abbruti.  Et  d'autant  plus  nous  faut-il  bien  noter  ce  passage,  quand  il  est  parle  des  sacrifices  de  iustice:  pour  monstrer  que  nous  ne  faisons  que  prophaner  le  Nom  de  Dieu,  quand  nous  ne  luy  apportons  point  nostre  coeur,  pour  luy  faire  une  oblation  pure  et  nette.  Et  mesmes  nous  voyons  que  David  a  prattique  de  son  12