27:178  fier  que  Iesus  Christ  n'a  point  fait  rien  pour  soy,  mais  que  le  tout  a  este  en  nostre  nom  :  et  que  quand  il  s'est  ainsi  approche  de  Dieu,  c'a  este  afin  de  nous  presenter  a  luy:  comme  il  dit:  Ie  me  sanctifie  moy-mesmes,  afin  que  vous  soyez  tous  participans  de  ceste  sainctete-la.  Nous  voyons  donc  la  raison  en  beaucoup  de  choses  qui  ont  este  commandees  en  la  Loy,  et  cognoissons  que  ce  n'est  point  sans  cause  que  l'Apostre  dit  que  le  tout  a  este  conforme  a  ce  patron  que  Moyse  avoit  veu  en  la  montaigne:  comme  aussi  sainct  Estienne  allegue  ce  lieu-la  au  septiesme  des  Actes.  Mais  cependant  si  nous  faut-il  noter  que  Dieu  a  voulu  retenir  son  peuple  en  obeissance,  afin  qu'il  fust  mieux  certifie  de  ce  qu'il  faisoit,  et  qu'il  n'eust  point  aussi  d'occasion  de  corrompre  le  vray  service,  en  meslant  nulles  inventions:  ie  di,  que  Dieu  a  voulu  exercer  son  peuple  en  obeissance:  car  autrement  si  nous  declairons  que  nous  voulons  servir  a  Dieu,  tout  ce  que  nous  aurons  fait  ne  sera  rien  qui  vaille:  mesmes  ce  sera  peche.  Si  ie  cuide,  et  cependant  que  ie  soye  en  bransle,  et  en  perplexite,  il  faut  que  tout  s'en  aille  en  ruine.  Car  si  nous  ne  sommes  esclairez  par  certitude  de  foy,  Dieu  n'approuve  rien  de  ce  que  nous  faisons.  Ainsi,  ie  di  qu'il  a  voulu  tenir  le  peuple  ancien  en  obeissance.  Et  voila  pourquoy  il  vouloit  qu'il  y  eust  tousiours  luminaire  au  temple.  Or  cela  n'estoit  point  pour  esclairer  Dieu,  ne  luy  faire  quelque  service:  mais  afin  que  le  peuple  en  sa  rudesse  fust  adverti  qu'il  ne  faut  point  aller  en  confus,  que  nous  ne  devons  point  estre  aveugles,  quand  nous  approchons  de  Dieu:  mais  qu'il  nous  faut  avoir  une  clarte  qui  nous  conduise:  et  ceste  clarte-la  ne  se  trouvera  point  en  nostre  cerveau,  il  faut  qu'elle  vienne  d'enhaut.  Et  voila  pourquoy  le  chandelier  sacre  avoit  ses  lampes  ou  il  y  avoit  tousiours  huille:  signifiant  que  si  les  hommes  ne  sont  gouvernez  et  conduits  par  le  sainct  Esprit,  ils  ne  feront  que  s'esgarer  ca  et  la,  et  trebuscheront  en  la  fin  en  ruine.  Et  puis  Dieu  ne  vouloit  point  qu'on  apportast  de  feu  estrange  a  son  autel.  Par  cela  il  signifie  que  les  hommes  ne  doivent  rien  apporter  de  leur  propre  quand  il  est  question  de  servir  Dieu,  il  faut  que  nous  ayons  le  feu  sacre,  c'est  a  dire,  que  nous  prions  Dieu  au  temple,  et  que  nous  ne  passions  point  sa  parolle,  et  la  doctrine  qu'il  nous  a  donnee.  Il  est  dit  que  nul  sacrifice  ne  soit  offert  sans  sel.  Et  pourquoy?  Car  c'est  une  chose  qui  n'a  nulle  saveur  devant  Dieu,  quand  nous  luy  voulons  offrir  sans  avoir  tesmoignage  qu'il  l'approuve,  et  qu'il  le  demande.  Voila  donc  en  somme  comme  Dieu  a  voulu  consoler  les  siens,  et  leur  donner  courage,  afin  qu'il  fust  servi  par  eux  comme  il  appartient.  Et  puis  il  a  voulu  retrancher  toute  occasion  d'adiouster  ce  qu'ils  avoyent  apprins  des  Payens.  Nous  savons  que  les  12