1:178  [CO  1.  178]  tum  composuit  (Ioan.  9),  alios  tactu  sanavit,  alios  verbo.  Ad  hunc  modum  apostoli  alios  morbos  solo  verbo,  alios  tactu,  alios  unctione  curarunt.  At  verisimile  est  unctionem  istam  non  temere,  ut  nec  alia  omnia,  fuisse  usurpatam.  Fateor;  non  tamen  ut  esset  curationis  organum,  sed  symbolum  duntaxat,  quo  imperitiorum  ruditas  admoneretur,  unde  tanta  virtus  prodiret,  ne  scilicet  eius  laudem  apostolis  tribuerent.  Oleo  autem  significari  spiritum  sanctum,  eiusque  dona,  vulgare  ac  tritum  est.  Caeterum  evanuit  gratia  illa  curationum,  quemadmodum  et  reliqua  miracula,  quae  ad  tempus  edi  voluit  Dominus,  quo  novam  evangelii  praedicationem  in  aeternum  admirabilem  redderet.  Ut  igitur  maxime  demus,  unctionem  sacramentum  fuisse  earum  virtutum  quae  tum  per  manus  apostolorum  administrabantur,  nihil  nunc  ad  nos  pertinet,  quibus  virtutum  administratio  commissa  non  est.  Et  qua  maiori  ratione  sacramentum  ex  hac  unctione  faciunt,  quam  ex  aliis  quibusvis  symbolis,  quae  nobis  in  scriptura  commemorantur?  Cur  non  aliquam  natatoriam  Siloah  destinant,  in  quam [p. 365]  certis  temporum  vicibus  se  immergant  male  habentes?  Frustra,  inquiunt,  id  fieret.  Certe  non  magis  frustra,  quam  unctio.  Cur  non  mortuis  incubant,  quoniam  puerum  mortuum,  illi  incu-  [OS  204]  bando,  suscitavit  Paulus?  Cur  non  lutum,  ex  sputo  et  pulvere  sacramentum  est?  Sed  alia  singularia  exempla  fuerunt,  hoc  autem  ab  Iacobo  praecipitur.  Nempe  pro  eo  tempore  loquebatur  Iacobus,  quo  adhuc  huiusmodi  Dei  benedictione  fruebatur  ecclesia.  Affirmant  quidem  eandem  etiamnum  vim  suae  unctioni  inesse;  sed  aliter  experimur.  Nemo  iam  miretur  quomodo  animas,  quas  verbo  Dei,  hoc  est,  vita  et  luce  sua  spoliatas,  stupidas  esse  et  caecas  sciebant,  tanta  confidentia  ludificati  sint,  cum  nihil  eos  pudeat  corporis  sensus  vivos  ac  sentientes  velle  fallere.  Ridiculos  ergo  se  faciunt,  dum  gratia  curationum  praeditos  sese  iactant.  Adest  sane  suis  Dominus  omnibus  saeculis,  et  eorum  languoribus,  quoties  opus  est,  medetur  non  minus  quam  olim;  sed  manifestas  illas  virtutes  non  ita  exerit,  sed  miracula  per  apostolorum  manus  non  dispensat.  Itaque,  ut  non  abs  re  apostoli  gratiam  curationum  sibi  demandatam  olei  symbolo  designabant,  non  suam,  sed  spiritus  sancti  esse  virtutem,  ita  rursum  spiritui  sancto  sunt  iniurii,  qui  putidum  et  nullius  energiae  oleum, [p. 366]  faciunt  eius  virtutem,  perindeque  id  est,  ac  si  quis  diceret:  omne  oleum  virtutem  esse  spiritus  sancti,  quod  eo  nomine  in  scriptura  nuncupetur,  omnem  columbam  esse  spiritum  sanctum,  quod  ea  specie  apparuerit.  Verum  de  iis  viderint.  Quod  nobis  in  praesentia  abunde  est,  certo  certius  perspicimus,  eorum  unctionem  sacramentum  non  esse;  quae  nec  caeremonia  est  a  Deo  instituta,  nec  12