55:176  10.  Et  illi  quidem  ad  paucos  dies.  Haec  secunda  est  amplificatio,  ut  dixi,  quod  Dei  castigationes  carni  domandae  et  mortificandae  destinentur,  ut  renovemur  in  coelestem  vitam.  Unde  apparet  fructum  esse  perpetuum:  idem  ab  hominibus  non  esse  sperandum,  quum  hominum  disciplina  pars  sit  ordinis  politici,  ideoque  proprie  ad  praesentem  vitam  spectet.  Unde  sequitur,  illas  longe  plus  utilitatis  adferre,  quanto  scilicet  spiritualis  Dei  sanctimonia  corporis  commodis  praestat.  Si  quis  obiiciat,  patrum  munus  esse  filios  instituere  in  timore  et  cultu  Dei,  ac  propterea  eorum  disciplinam  ad  tam  breve  tempus  restringendam  non  videri:  respondeo,  id  quidem  esse  verum;  sed  hic  de  oeconomia  apostolus  loquitur  quemadmodum  de  politia  solemus  vulgo  loqui.  Nam  etsi  magistratuum  est  religionem  tueri,  eorum  tamen  officium  huius  vitae  finibus  dicemus  contineri:  quia  aliter  civilis  ac  terrena  gubernatio  a  spirituali  Christi  regno  distingui  non  posset.  Porro  quod  correctiones  Dei  dicuntur  utiles  esse  ad  obtinendam  eius  sanctimoniam,  hoc  non  ita  accipiendum  est  quasi  nos  proprie  sanctificent:  sed  quod  adminicula  sint  ad  nos  praeparandos,  quia  per  ea  Dominus  nos  exercet  ad  mortificationem  carnis.  11.  Omnis  castigatio.  Hoc  addit,  ne  Dei  castigationes  praesenti  sensu  metiamur.  Nos  enim  pueris  similes  esse  docet,  qui  ferulam  horrent  ac  refugiunt  quantum  in  se  est:  quia  nondum  per  aetatem  iudicant  quantum  sibi  sit  utilis.  Huc  ergo  tendit  admonitio,  non  recte  aestimatum  iri  castigationes  ex  praesenti  carnis  nostrae  sensu  :  ideo  coniiciendos  esse  oculos  in  finem  :  ita  apprehendemus  tranquillum  hunc  iustitiae  fructum.  Fructus  autem  i  u  s  t  i  t  i  a  e  dicitur  timor  Domini,  et  pia  sanctaque  vita:  cuius  crux  magistra  est.  Pacatum1  )  vocat,  quoniam  in.  rebus  adversis  trepidamus  et  sumus  inquieti.  Tentamur  enim  impatientia,  quae  semper  tumultuosa  est:  castigati  autem,  composita  mente  agnoscimus  quam  utile  nobis  fuerit  quod  ante  acerbum  et  molestum  videbatur.  12.  Quare  manus  remissas  et  genua  soluta  surrigite:  13.  et  rectas  facite  vias  pedibus  vestris:  ne  claudicatio  aberret,  sed  magis  sanetur.  14.  Pacem  sectamini  cum  omnibus,  et  sanctimoniam:  sine  qua  nemo  videbit  Dominum.  15.  Curam  agentes  ne  quis  deficiat  a  gratia  Dei,  ne  qua  radix  amaritudinis  sursum  pullulans  obturbet,  et  per  eam  inquinentur  multi.  16.  Ne  quis  scortator  vel  profanus,  ut  Esau,  qui  pro  uno  edulio  vendidit  primogenituram  suam.  17.  Nostis  enim  quod,  quum  postea  vellet  haereditariam  obtinere  benedictionem,  reprobatus  sit.  Poenitentiae  enim  locum  non  invenit,  etiamsi  cum  lacrymis  quaesiisset  eam.  O  Tranquillum