29:176  vie.  Or  auiourd'huy  son  service  est  spirituel,  il  ne  gist  point  en  ces  ombrages  et  ceremonies  de  la  Loy.  Que  donc  nous  incitions  chacun  a  venir  ouir  la  parolle  de  Dieu,  que  nous  en  traittions  ensemble  pour  edifier  les  uns  les  autres:  que  nous  donnions  bon  exemple  aussi  de  mettre  en  luy  toute  nostre  fiance,  d'estre  patiens  en  nos  adversitez,  de  cheminer  sous  sa  crainte.  Apres,  que  nous  l'invoquions,  comme  c'est  le  principal  sacrifice  qu'il  demande  de  nous,  que  nous  ayons  tout  nostre  refuge  a  luy,  que  nous  luy  rendions  la  louange  qui  luy  est  deue  de  tous  ses  benefices:  que  donc  nous  incitions  chacun  a  ce  faire.  Voila  ce  qui  nous  est  declare  en  l'exemple  de  Zabulon  et  d'Issachar.  Mais  comme  i'ay  dit,  il  ne  faut  pas  enseigner  nos  prochains,  et  cependant  que  nous  demeurions  derriere:  mais  il  nous  leur  faut  tenir  compagnie.  Et  voila  pourquoy  il  est  dit,  que  tous  adoreront.  Quand  donc  nous  voudrons  nous  acquitter  de  nostre  devoir,  il  ne  faut  pas  dire  aux  autres,  Priez  Dieu,  mettez  vostre  fiance  en  luy,  et  rendez  luy  graces  de  tant  de  biens  qu'il  vous  a  e8largis,  dediez-luy  vostre  vie  en  toute  purete:  il  n'est  pas  question  de  nous  acquitter  en  telle  sorte.  Quoy  donc?  Que  nous  soyons  conioints  avec  eux,  pour  dire:  Servons  a  nostre  Dieu,  adorons-le,  qu'il  soit  invoque  de  nous,  et  que  mesmes  nous  monstrions  le  chemin  a  ceux  qui  ont  besoin  d'estre  incitez  par  nous.  Voila  donc  ce  que  nous  avons  a  prattiquer  de  ce  passage  en  second  lieu.  Or  ici  on  pourroit  demander  pourquoy  Moyse  parle  plustost  de  Zabulon  et  d'Issachar  que  des  autres.  Or  il  est  vraysemblable  que  c'est  a  cause  de  la  situation  du  lieu.  Car  premierement  ils  estoyent  assez  eslongnez  du  temple:  et  pourtant  il  y  avoit  plus  de  difficulte  d'offrir  sacrifices,  pource  que  le  voyage  estoit  penible:  ou  il  estoit  aise  qu'ils  s'abastardissent,  estans  ainsi  eslongnez,  et  meslez  parmi  les  Payens:  qu'ils  pouvoyent  estre  la  endurcis,  et  ne  tenir  pas  grand  conte  de  la  religion,  ni  de  toute  la  Loy.  Voila  pourquoy  notamment  Moyse  leur  attribue  ce  titre  de  ce  zele-la,  qu'ils  inciteront  les  peuples  au  service  de  Dieu.  Il  est  vray  que  la  lignee  de  Gad  (dont  ii  sera  fait  mention),  et  aussi  une  partie  d'Ephraim  demanderent  bien  partage  outre  lo  Iordain:  mais  combien  qu'ils  fussent  eslongnez  du  temple,  si  pouvoyent-ils  avoir  une  religion  simple,  ils  n'estoyent  point  ainsi  meslez  parmi  les  Payens,  il  n'y  avoit  point  si  grandes  corruptions  qu'en  ces  lignees  de  Zabulon  et  d'Issachar.  Car  nous  savons  qu'ils  estoyent  la  prochains  de  Galilee:  et  mesme  il  y  avoit  une  partie  de  Galilee  nommee  des  Payens.  Et  quand  Salomon  fut  en  la  plus  grande  prosperite  de  son  royaume,  nous  voyons  qu'encores  il  donna  des  villes  en  ce  pays-la  au  roy  Hiram:  qu'il  sembloit  que  le  peuple  deust  estre  comme  corrompu.  Et  mesmes  sous  ce  mot  de  peuple,  non  seulement