52:175  175  EPIST.  PAULI  AD  THESSALONICENSES  I  176  die  imo  singulis  momentis  pacem  nostram  inquietare  et  gaudium  excutere  nobis  possent:  ideo  continenter  nos  orare  iubet.  De  hac  autem  precandi  assiduitate  alibi  diximus.  Gratiarum  actio,  ut  dixi,  quasi  temperamentum  subiicitur.  Multi  enim  sic  orant,  ut  tamen  obmurmurent  Deo  ac  fremant,  nisi  protinus  obsequatur  eorum  votis.  Atqui  desideria  nostra  sic  fraenari  convenit,  ut  contenti  eo,  quod  datur,  gratiarum  actionem  semper  misceamus  votis.  Petere  quidem  licet,  gemere  etiam  et  conqueri:  sed  ita  ut  nobis  magis  adlubescat  Dei  voluntas  quam  nostra.  18.  Haec  enim  Dei  voluntas.  Nempe  ut  gratias  agamus,  secundum  Chrysostomi  sententiam.  Ego  pleniorem  sensum  contineri  puto  sub  his  verbis  :  quod  talis  sit  erga  nos  Dei  affectus  in  Christo,  ut  in  afflictionibus  quoque  largam  habeamus  materiam  gratias  agendi.  Quid  enim  ad  nos  placandos  aptius  aut  magis  appositum,  quam  dum  audimus  Deum  sic  nos  in  Christo  complecti,  ut  in  bonum  ac  salutem  vertat  quidquid  nobis  accidit?  Meminerimus  ergo,  hoc  singulare  esse  corrigendae  impatientiae  remedium,  ab  intuitu  praesentium  malorum,  quae  nos  cruciant,  oculos  referre  in  diversam  considerationem,  qualiter  erga  nos  affectus  sit  Deus  in  Christo.  19.  Spiritum  ne  exstinguatis.  Haec  metaphora  ducta  est  a  vi  et  natura  spiritus:  nam  quum  proprium  spiritus  officium  sit  illustrare  mentes,  atque  ideo  vocetur  lux  nostra:  proprie  dicimur  eum  exstinguere  dum  eius  gratiam  exinanimus.  Sunt  qui  putant  idem  dici  hoc  et  proximo  membro.  Ergo  secundum  eos,  spiritum  exstinguere  nihil  aliud  est  quam  contemnere  prophetias.  Verum  quia  diversis  modis  exstinguitur  spiritus,  haec  duo  inter  se  distinguo,  tanquam  genus  et  speciem.  Tametsi  enim  contemptus  prophetiae  est  exstinctio  spiritus,  spiritum  tamen  illi  etiam  exstinguunt  qui,  quum  profectu  quotidiano  magis  ac  magis  accensas  a  Deo  scintillas  excitare  debeant,  sua  ignavia  in  nihilum  redigunt  dona  Dei.  Itaque  latius  patet  haec  admonitio  de  non  exstinguendo  spiritu,  quam  proxima  de  non  spernendis  prophetiis.  Sensus  prioris  est:  estis  spiritu  Dei  illuminati:  videte  ne  vestra  ingratitudine  lux  ista  vobis  pereat.  Valde  utilis  admonitio:  nam  eos  qui  semel  illuminati  fuerant,  ubi  respuunt  tam  pretiosum  Dei  donum,  vel  clausis  oculis  se  abripi  sinunt  in  mundi  vanitatem,  horrenda  caecitate  percuti  cernimus,  ut  sint  aliis  in  exemplum.  Cavendum  igitur  a  socordia,  qua  Dei  lumen  in  nobis  suffocatur.  Caeterum  qui  hinc  colligunt,  in  hominis  arbitrio  esse  vel  exstinguere,  vel  fovere  lucem  oblatam,  ut  gratiae  efficaciam  extenuent,  ac  facultates  extollant  liberi  arbitrii:  male  ratiocinantur.  Quamquam  enim  efficaciter  in  suis  electis  operatur  Deus,  neque  tantum  lucem  illis  admovet,  sed  facit  ut  videant,  oculos  cordis  illis  aperit