5:175  PSYCHOPANNYCHIA.  pergunt  quod  semel  temere  effutiverunt:  tum  oracula  Dei  consulunt,  ex  quibus  errorum  suorum  patrocinia  quaerant.  Ibi,  Deus  bone,  quid  non  invertunt?  quid  non  depravant  atque  corrumpunt?  ut  ad  sensum  suum,  non  dico  inflectant,  sed  vi  incurvent.  Scilicet  vere  dixit  poeta,  Furor  arma  ministrat.  1)  Haeccine  est  discendi  via?  versare  ac  volutare  scripturas,  ut  libidini  nostrae  serviant?  ut  sensui  nostro  subiiciantur?  quo  nihil  est  stolidius.  O  sonticam  pestem,  et  certissima  zizania  inimici  hominis:  quibus  vult  occaecare  verum  semen.  Et  adhuc  miramur  unde  tot  sectae  inter  eos  qui  primum  nomen  evangelio  dederant,  ac  renascenti  verbo?  Equidem  terret  me  dira  illo  denunciatio:  Auferetur  a  vobis  regnum  Dei,  et  dabitur  genti  facienti  fructum  eius  (Matth.  21,  43).  Finem  hic  conquerendi  faciam.  Nam  longum  volumen  conscribendum  sit,  si  in  hanc  temporum  perversitatem  ad  iustum  modum  declamare  libeat.  Nos  vero,  fratres,  tot  exemplis  moniti,  vel  sero  tandem  sapiamus.  Pendeamus  semper  ex  ore  Domini:  et  ne  quid  ad  eius  sapientiam  addamus  aut  admisceamus  de  nostro,  ne,  velut  fermentum,  totam  massam  corrumpat,  et  salem  etiam  ipsum,  qui  in  nobis  est,  infatuet.  Praestemus  nos  Domino  quales  vult  habere  discipulos:  pauperes,  sapientiae  nostrae  inanes  et  vacuos,  discendi  avidos,  sed  nihil  scientes,  aut  etiam  scire  volentes,  nisi  quod  ille  docuerit:  quidquid  est  exoticum,  non  secus  ac  praesentissimum  venenum  fugientes.  Volo  autem  et  iis  occurrere,  qui  consilium  meum  reprehendent:  quod  de  re  nihili  concitem  ingentes  pugnas,  atque  istaec  leptologemata  cruentis  dissidiis  decidam.  Non  enim  desunt  qui  sic  me  accipiant.  His  responsum  sit:  quum  ex  professo  tentatur  Dei  veritas,  nullo  modo  ferendum  esse,  ne  tantillum  quidem  ex  ea  delibari.  Nec  rem  esse  nihili  aut  contemnendam,  videre  tenebris  diaboli  exstingui  Dei  lucem.  Deinde,  maioris  momenti  esse  hanc  causam,  quam  a  multis  credatur.  Neque  tamen  (ut  falso  interpretantur)  ad  cruorem  usque  dissidet,  qui  aliorum  erroribus  non  acquiescit.  Reprehendi  eorum  curiositatem,  qui  has  quaestiones,  revera  nihil  aliud  quam  ingenii  tormenta,  exagitarent.  Postquam  autem  moverunt  hanc  camarinam,  reprimenda  est  eorum  temeritas,  ne  supra  veritatem  invalescat.  Id  an  effecerim,  nescio,  volui  certe:  et  quod  optimum  habui,  dedi.  Alii,  si  quid  melius  habeant,  in  commune  bonum  conferant.  Basileae,  M.  D.  XXXVI.  1)  Vergil.  Aeneid.  1,  150.