55:174  paterni  amoris  demonstratio  est.  Deinde  reprobi  quum  se  Dei  manu  gubernari  ignorent,  fortuito  ut  plurimum  putant  se  affligi.  Quemadmodum  si  quis  puer  contumax,  relicta  patris  domo,  longe  erret:  fame  et  frigore  vel  aliis  malis  confectus,  dabit  quidem  iustas  stultitiae  suae  poenas  :  suisque  malis  discet  quid  sit  esse  patri  morigerum  ac  obsequentem:  sed  tamen  hanc  esse  paternam  castigationem  non  agnoscet.  Ita  impii,  quum  se  a  Deo  eiusque  familia  quodammodo  manciparint,  non  intelligunt  Dei  manum  ad  se  usque  pervenire.  Meminerimus  ergo,  divini  erga  nos  amoris  gustum  aliter  a  nobis  percipi  non  posse  in  castigationibus,  quam  dum  illud  nobis  persuasum  est,  paternas  esse  ferulas,  quibus  peccata  nostra  castigat.  Nihil  tale  reprobis  evenire  potest,  quorum  fugitivae  sunt  mentes.  Huc  accedit  quod  iudicium  incipere  oportet  a  domo  Dei.  Proinde  etiamsi  communiter  alienos  et  domesticos  feriat,  sic  tamen  manum  suam  erga  posteriores  exserit,  ut  demonstret  se  peculiarem  habere  eorum  curam.  Sed  illa  est  vera  solutio,  quod  quisquis  a  Deo  se  castigari  novit  et  persuasus  est,  gradum  protinus  facere  debet  ad  hanc  cogitationem:  id  accidere,  quoniam  a  Deo  ametur.  Nam  quum  Deum  in  poenis  medium  sentiant  fideles,  certum  habent  benevolentiae  eius  pignus,  quia  nisi  amaret,  non  esset  sollicitus  de  eorum  salute.  Ideo  concludit  apostolus,  Deum  omnibus  offerri  patrem  qui  correctionem  sustinent  Nam  qui  calcitrant,  ut  equi  feroces  solent,  vel  qui  praefracte  reluctantur,  minime  pertinent  ad  hunc  ordinem.  Quare  in  summa  docet  tunc  nobis  demum  paternas  esse  Dei  correctiones,  quum  illi  nos  obedienter  subiicimus.  7.  Quis  enim  est  filius.  A  communi  hominum  more  ratiocinatur,  minime  esse  consentaneum  ut  filii  Dei  a  crucis  disciplina  sint  immunes.  Nam  si  nemo  inter  homines  invenitur,  prudens  saltem  sanique  iudicii,  qui  non  liberos  suos  corrigat,  quoniam  sine  disciplina  ad  bonam  frugem  adduci  nequeunt:  quanto  minus  hoc  tam  necessarium  remedium  Deus,  qui  optimus  et  sapientissimus  est  pater,  negliget?  Si  quis  obiiciat,  cessare  inter  homines  eiusmodi  correctionem  simulatque  ex  adolescentia  egressi  sunt  liberi:  respondeo,  nos,  quamdiu  vivimus,  Dei  respectu  esse  magis  quam  pueros:  atque  hanc  causam  esse  cur  tergo  nostro  ferulam  semper  haerere  conveniat.  Quare  merito  infert  apostolus,  quisquis  immunitatem  a  cruce  appetit,  eum  se  veluti  abdicare  e  numero  filiorum  Dei.  Unde  sequitur,  non  aestimari  a  nobis,  ut  decet  adoptionis  beneficium,  totamque  Dei  gratiam  repudiari  quum  nos  ab  eius  ferulis  subducere  volumus.  Quod  faciunt  quicunque  aequo  animo  afflictiones  non  tolerant.  Cur  autem  spurios  potius  quam  alienos  vocat  qui  correctionem  refugiunt?  nempe,  quia  eos  alloquitur  qui  in  ecclesiam  cooptati  erant:  ideoque  filii  Dei.  Quare  significat,