50:174  committat  in  certamen  cum  sua  doctrina:  sed  qui  rite  omnia  expendet,  videbit  eum  necessario  hoc  fecisse.  Certum  quidem  est,  coelestes  angelos  nihil  posse  aliud  afferre  quam  certam  Dei  veritatem:  sed  quum  de  fide  doctrinae  in  hominum  salutem  divinitus  revelatae  esset  disceptatio:  non  satis  habuit  eam  eximere  ab  hominum  arbitrio,  nisi  angelis  etiam  superiorem  assereret.  Ideo  quum  angelis  iudicium  anathematis  denuntiat,  si  aliud  docuerint,  tametsi  est  argumentum  ab  impossibili,  non  tamen  est  supervacuum.  Neque  enim  parum  valet  hic  excessus  ad  amplificandam  Paulinae  praedicationis  fidem.  Videbat  se  et  illam  premi  altis  hominum  titulis.  Respondet,  ne  angelos  quidem  habere  quidquam  momenti  ad  illam  deprimendam.  Neque  iniuriam  facit  angelis:  nam  quum  illustrandae  quibuscunque  fieri  potest  modis  Dei  gloriae  sint  creati,  qui  in  hunc  finem  pie  abutitur  ipsorum  nomine,  nihil  derogat  illorum  dignitati.  Hinc  autem  non  tantum  colligimus  quanta  sit  verbi  Dei  maiestas,  sed  fides  etiam  nostra  singularem  confirmationem  percipit,  dum  verbo  Dei  freti  tuto  possumus  angelis  insultare  ac  maledicere.  Quum  dicit  anathema  esto:  subaudiendum  est  vobis.  De  nomine  anathematis  dictum  est  1.  Corin.  12,  3:  exsecrationem  hic  significat  et  capitur  pro  verbo  hebraico  D1F1-  9.  Quemadmodum  praedixit  Nunc,  omissa  sui  et  angelorum  mentione,  generaliter  iterum  repetit,  nulli  mortalium  fas  esse,  aliud  tradere  quam  didicerant.  Nota  verbum  a  c  c  e  p  i  s  t  i  s  :  semper  enim  huc  incumbit,  ne  ignotum  evangelium,  imaginatione  sua  quasi  in  aere  suspendant,  sed  teneant  certam  eius  definitionem,  ac  serio  persuasi  sint,  illud  quod  illis  traditum  est  et  amplexi  sunt,  verum  Christi  esse  evangelium.  Nam  fidei  nihil  minus  convenit  quam  opinatio.  Quid  igitur  si  quis  haesitet,  quid  et  quale  sit  evangelium  ignorans.  Praecipit  itaque  pro  diabolis  haberi  quicunque  evangelium  aliud  a  suo  afferre  ausi  fuerint:  aliud  nominans,  cui  aliena  commenta  assuuntur.  Neque  enim  prorsus  contraria  erat  doctrina  pseudoapostolorum,  aut  etiam  diversa,  sed  falsis  additamentis  corrupta.  Puerile  igitur  est  papistarum  subterfugium,  quum  sic  Pauli  verba  eludunt,  primum,  non  exstare  totam  eius  praedicationem:  nec  sciri  posse  quid  continuerit,  nisi  testes  a  mortuis  excitentur  Galatae,  qui  audierunt.  Deinde  non  prohiberi  quin  aliquid  addatur:  sed  tantum  alia  evangelia  damnari.  Nam  Pauli  quale  fuerit,  quoad  nostra  scire  interest,  non  obscure  ex  eius  scriptis  colligimus.  Huius  evangelii  palam  est,  totum  papatum  horrendam  esse  eversionem.  Postremo,  ex  circumstantia  patet,  adulterinam  quamlibet  doctrinam  aliam  esse  a  praedicatione  Pauli.  Quare  nihil  proficiunt  ita  cavillando.