27:174  de  l'annee,  ou  quand  ils  venoyent  trois  ou  quatre  fois  l'an  en  la  ville  de  Ierusalem  pour  sacrifier:  mais  il  falloit  qu'ils  pensassent:  combien  que  nous  soyons  loin  du  temple,  et  que  nous  ne  soyons  point  la  pour  faire  les  sacrifices:  tant  y  a  que  nous  ne  laissons  pas  d'estre  au  regard  de  nostre  Dieu:  car  il  veille  sur  nous,  et  nous  sommes  en  sa  protection.  Est-il  donc  question  de  boire  et  de  manger?  Cognoissons  qu'il  nous  voit,  et  nous  ne  pouvons  pas  eschapper  sa  veue:  qu'il  ne  faut  pas  aussi  que  nous  le  mettions  en  oubli.  Comme  les  hommes  quand  ils  se  veulent  resiouir,  ils  s'esgayent  en  telle  sorte,  qu'il  leur  semble  qu'ils  se  pourront  eslongner  de  luy.  Or  au  contraire  Dieu  a  voulu  admonnester  le  peuple  ancien,  qu'en  beuvant  et  mangeant  il  falloit  qu'il  eust  tousiours  ceste  pensee:  Dieu  nous  voit.  Auiourd'huy  nous  n'avons  plus  ceste  ceremonie  de  faire  des  repas  en  Ierusalem,  et  prochains  du  temple:  mais  tant  y  a  que  la  verite  nous  demeure  tousiours,  c'est  que  nous  sommes  admonnestez  quand  nous  serons  venus  au  temple,  que  nous  aurons  este  assemblez  au  nom  de  nostre  Dieu,  que  si  chacun  retourne  en  sa  maison  pour  disner,  ce  n'est  pas  que  nous  laissions  Dieu  ici  au  temple,  et  que  nous  luy  donnions  conge,  et  que  nous  le  prenions  aussi  :  mais  c'est  afin  que  nous  sachions  qu'il  conduit  nos  pas,  et  que  quand  nous  serons  venus  en  nostre  prive,  pour  prendre  chacun  sa  refection,  qu'il  nous  faut  la  estre  comme  en  la  presence  de  nostre  Dieu,  il  nous  faut  tellement  esiouir,  qu'il  soit  tesmoin  de  nostre  ioye:  car  nous  savons  que  si  nos  ioyes  sont  prophanes,  quelles  seront  maudites  de  Dieu.  Apprenons  donc  de  tousiours  refreschir  la  memoire,  que  nostre  Dieu  nous  conduit  par  tout,  et  que  iamais  il  ne  nous  delaisse,  afin  aussi  que  nous  ne  soyons  point  comme  bestes  esgarees.  C'est  ce  que  nous  avons  a  noter  de  ce  passage.  La  ceremonie  en  estoit  du  temps  de  la  Loy:  auiourd'huy  contentons-nous  de  la  verite,  et  cognoissons,  puis  que  nostre  Seigneur  Iesus  Christ  nous  est  apparu,  qu'il  ne  faut  plus  de  temple  materiel  pour  dire  que  Dieu  est  avec  nous:  car  nostre  Seigneur  Iesus  n'a  point  prins  en  vain  le  nom  d'Emmanuel:  comme  il  est  ainsi  nomme  par  le  Prophete  Isaie,  c'est  a  dire:  Dieu  avec  nous.  Et  puis  qu'ainsi  est  que  Iesus  Christ  declaire  que  iusques  a  la  fin  du  monde  il  sera  tousiours  avec  nous:  ne  craignons  point  que  Dieu  ne  nous  accepte  pour  ses  enfans,  que  moyennant  qu'en  passant  ceste  vie  caduque  nous  regardions  tousiours  a  luy,  et  que  nous  tendions  a  son  royaume  celeste,  il  fera  que  tout  le  reste  soit  dedie  a  son  honneur,  tellement  que  le  boire  et  le  manger  mesmes  seront  comme  un  accessoire  de  son  service,  et  qu'il  acceptera  cela,  et  luy  sera  agreable,  moyennant  que  nous  luy  facions  hommage  de  tout,  en  attendant  qu'il  nous  re-