55:173  173  EPIST.  AD  HEBRAEOS  174  nunc  non  agit  apostolus:  tantum  docet,  persequutiones,  quas  pro  evangelio  sustinemus,  alio  quoque  nomine  esse  nobis  utiles:  quia  remedia  sint  ad  destruendum  peccatum.  Nam  hoc  modo  Deus  sub  disciplinae  suae  iugo  nos  retinet,  ne  caro  nostra  lasciviat:  interdum  etiam  ferocientes  coercet:  delicta  interdum  nostra  punit,  ut  in  posterum  nos  reddat  cautiores.  Sive  ergo  vitiis  nostris  medeatur,  sive  antequam  peccemus,  occupet,  ita  nos  exercet  in  hac,  cuius  meminit  apostolus,  contra  peccatum  lucta.  Hoc  quidem  honore  nos  dignatur  filius  Dei,  ut  quae  pro  evangelio  suo  patimur,  minime  inter  poenas  peccati  deputet.  Nostrum  tamen  est  agnoscere  quod  hic  audimus  ex  apostolo,  sic  nos  agere  ac  defendere  adversus  impios  Christi  causam,  ut  interea  cum  peccato,  hoste  intestino,  bellum  geramus.  Haec  duplex  erga  nos  est  Dei  gratia:  quod  remedia,  quae  curandis  vitiis  nostris  adhibet,  in  evangelii  sui  defensionem  convertit.  Meminerimus  autem  quos  hic  compellet:  nempe  qui  laeto  animo  bonorum  suorum  iacturam  fecerant,  passique  fuerant  multas  contumelias.  Et  tamen  ignaviae  eos  insimulat,  quod  in  medio  certaminum  cursu  defessi,  non  strenue  pergant  ad  mortem  usque.  Quare  non  est  quod  missionem  nobis  petamus  a  Domino,  qualicunque  militia  perfuncti  simus:  quia  nullos  habere  vult  Christus  emeritos  milites,  nisi  qui  mortem  ipsam  vicerunt.  5.  Et  obliti  estis.  Interrogative  lego.  Quaerit  enim  an  obliti  sint:  significans  nondum  esse  obliviscendi  tempus.  Hic  vero  ingreditur  in  illam  doctrinae  partem,  quod  utile  nobis  sit  cruce  erudiri.  Ad  eam  rem  utitur  testimonio  Solomonis:  cuius  duo  sunt  membra:  prius  est,  non  reiiciendam  esse  correctionem  Domini:  in  secundo  causa  redditur,  quia  Dominus  quos  diligit  castigat.  Quoniam  autem  Solomon  sic  praefatur:  Fili  mi:  monet  apostolus,  hac  tam  suavi  blandaque  appellatione  debere  nos  allici  ut  haec  exhortatio  penitus  in  animos  nostros  penetret.  Caeterum  Solomonis  argumentum  hoc  est,  Si  flagella  Dei  eius  erga  nos  amorem  testantur:  indignum  est  fastidio  vel  odio  ipsa  haberi.  Plusquam  enim  ingratos  esse  oportet  qui  in  suam  salutem  a  Deo  castigari  non  sustinent:  imo  qui  paternae  eius  benevolentiae  signum  respuunt.  6.  Quem  diligit  Dominus.  Haec  ratio  videtur  parum  firma  esse.  Promiscue  enim  animadvertit  Deus  tam  in  reprobos  quam  in  electos:  et  eius  flagella  iram  eius  saepius  quam  amorem  declarant.  Sic  enim  et  scriptura  loquitur,  et  experientia  etiam  confirmat.  Verum  ubi  sermo  ad  pios  habetur,  non  mirum  est  eum  duntaxat  castigationis  usum  attingi  quem  illi  sentiunt.  Nam  utcunque  severum  se  et  iratum  iudicem  erga  reprobos  Deus  ostendat  quoties  eos  punit  :  in  electis  tamen  suis  non  alium  finem  spectat,  quam  ut  eorum  consulat  saluti.  Haec