27:173  173  SUR  LE  DEUTER.  CHAP.  XII.  174  'oeuvres  et  mangerez  en  la  presence  de  vostre  Dieu,  et  vous,  et  vos  maisons:  et  quand  vous  viendrez  la,  Dieu  vous  benira.  Ici  Moyse  adiouste,  que  quand  le  peuple  se  rangera  ainsi  qu'il  a  dit  dessus,  que  Dieu  le  fera  prosperer:  c'est  la  somme  de  ce  qu'il  veut  dire.  Or  cependant  il  nous  monstre,  mesmes  quant  a  ce  qui  concerne  ceste  vie  temporelle,  qu'il  nous  faut  dedier  le  tout  au  service,  et  a  l'honneur  de  nostre  Dieu.  Et  ceci  est  bien  notable  :  car  nous  voyons  que  le  monde  se  voudroit  tellement  acquitter  envers  Dieu,  qu'apres  l'avoir  servi,  il  eust  treves.  Comme  quoy?  Les  plus  grands  bigots  en  la  Papaute,  quand  ils  auront  fait  tous  leurs  agios  en  leurs  temples,  quand  ils  auront  prins  beaucoup  d'asperges  d'eau  beneite,  qu'ils  auront  fait  leurs  grandes  croix,  qu'ils  auront  fait  beaucoup  de  mea  culpa,  il  leur  semble  que  tout  le  reste  du  iour  ils  pourront  tourner  le  dos  a,  Dieu,  quand  ils  auront  tourne  le  cui  au  temple,  et  que  Dieu  ne  les  voit  plus.  Et  pourquoy?  Pource  que  le  voila  bien  paye,  il  faut  qu'il  se  contente.  Voila  comme  les  hommes  se  gouvernent.  Et  pourquoy?  C'est  que  nous  ne  cognoissons  point  que  le  service  de  Dieu  est  tellement  spirituel,  que  toutesfois  en  ce  que  nous  faisons  quant  a  la  vie  presente,  il  faut  que  le  tout  se  rapporte  la.  Comme  quand  nous  beuvons  et  mangeons,  il  est  vray  que  c'est  afin  que  nous  soyons  substantez  au  monde,  iusques  a  ce  que  Dieu  nous  en  retire:  nous  avons  les  autres  necessitez  de  ceste  vie,  chacun  fera  ses  negoces,  chacun  aura  son  travail,  et  labeur:  or  il  est  vray  que  tout  cela  est  du  monde,  et  de  la  terre:  mais  il  ne  se  doit  pas  separer  du  ciel,  quoy  qu'il  en  soit.  Ainsi,  quand  nous  venons  pour  boire,  et  pour  manger,  cognoissons  que  tellement  nous  prenons  la  nourriture  de  nos  corps,  qu'il  faut  que  la  nous  avons  quelque  goust  de  la  bonte  de  nostre  Dieu,  que  nous  puissions  nous  esiouyr  en  luy,  d'autant  qu'il  est  nostre  pere  nourricier,  que  c'est  luy  duquel  nous  tenons  nostre  pain  ordinaire:  comme  nous  le  protestons  en  luy  demandant.  Quand  nous  avons  prins  nostre  repas,  il  faut  que  nous  poursuyvions  pour  estre  rassasiez  des  biens  qui  nous  sont  apprestez  au  ciel,  quand  nous  partirons  de  ce  monde,  et  que  desia  nous  en  ayons  quelque  commencement,  et  que  nous  y  aspirions  tousiours  de  plus  en  plus.  Voila  donc  ce  que  Moyse  a  entendu  notamment  en  ce  passage,  disant:  Apres  que  vous  aurez  sacrifie  a  vostre  Dieu,  la  vous-vous  esiouyrez  en  sa  presence:  car  avec  les  sacrifices  il  y  avoit  les  banquets  que  faisoit  le  peuple.  Et  comment?  Des  banquets  sacrez:  non  pas  que  Dieu  fust  honore  en  beuvant,  et  mangeant:  mais  c'estoit  un  tesmoignage  qu'il  falloit  que  toute  leur  vie  ils  cogneussent  qu'ils  estoyent  en  la  presence  de  Dieu,  que  ce  n'estoit  point  seulement  au  commencement