52:172  Tales  quidem  papa  facile  in  suum  catalogum  recipit,  sed  eos  e  suo  expungit  spiritus  Dei.  Quia  autem  contemptim  (ut  dictum  est)  habentur  in  mundo,  simul  praefecturae  nomine  illos  ornat.  Tales  qui  docendo  impendunt  operam,  nec  aliter  praesunt  nisi  ut  serviant  ecclesiae,  Paulus  in  pretio  non  vulgari  haberi  iubet.  Nam  ad  verbum  sic  loquitur,  plus  quam  abunde  honore  prosequi.  Nec  immerito:  observanda  enim  est  ratio  quam  mox  subiicit,  nempe  propter  opus  ipsorum.  Est  autem  opus  hoc  aedificatio  ecclesiae,  aeterna  animarum  salus,  mundi  reparatio,  denique  regnum  Dei  et  Christi.  Huius  operis  inaestimabilis  est  excellentia  ac  dignitas:  ergo  quos  tantae  rei  ministros  facit  Deus,  nobis  eximios  esse  oportet.  Verum  ex  Pauli  verbis  colligere  licet,  iudicium  ecclesiae  mandari,  ut  veros  pastores  discernat.  Nam  frustra  notae  istae  adscriberentur,  nisi  vellet  a  fidelibus  eas  animadverti.  Et  quum  iubet  honorem  deferri  laborantibus,  et  iis  qui  docendo  rite  et  fideliter  gubernant:  otiosos  certe  et  improbos  neque  dignatur  ullo  honore,  neque  dignos  esse  ostendit.  Praesunt  in  Domino.  Hoc  additum  videtur  ad  notandum  spirituale  regimen.  Tametsi  enim  reges  quoque  et  magistratus  Dei  ordinatione  praesunt:  quia  tamen  ecclesiae  gubernationem  Dominus  peculiariter  vult  suam  agnosci,  ideo  nominatim  praeesse  in  Domino  dicuntur  qui  Christi  nomine  et  mandato  ecclesiam  gubernant.  Caeterum  hinc  colligere  licet  quantum  absint  a  pastorum  ac  praesulum  ordine,  qui  tyrannidem  a  Christo  prorsus  alienam  exercent.  Certe  ut  quis  inter  legitimos  pastores  censeatur,  necesse  est  ut  se  in  Domino  praeesse  ostendat,  nec  ab  eo  quidquam  habeat  separatum.  Hoc  autem  quid  aliud  est,  quam  pura  doctrina  Christum  in  sua  sede  collocare,  ut  solus  sit  dominus  et  magister?  13.  Cum  caritate.  Alii  vertunt,  per  caritatem.  Paulus  enim  dicit,  in  caritate:  quod  secundum  hebraicae  linguae  phrasim  valet  per  aut  cum.  Ego  tamen  malo  ita  exponere,  quod  non  tantum  ipsos  revereri,  sed  etiam  amare  iubeat.  Nam  ut  amabilis  est  evangelii  doctrina,  sic  eius  ministros  diligere  convenit.  Durius  autem  esset  illud,  per  caritatem  habere  in  pretio,  quum  apte  cohaereat  amoris  cum  honore  coniunctio.  Pacem  habete.  Quamquam  hic  locus  varie  legitur  etiam  apud  Graecos,  mihi  tamen  magis  arridet  ea  lectio,  quam  reddidit  vetus  interpres  et  sequutus  est  Erasmus:  nempe  pacem  habete  cum  eis,  vel  colite.  Voluit  enim  (meo  iudicio)  Paulus  Satanae  artibus  obviam  ire,  qui  non  cessat  omnia  moliri  ut  vel  iurgia,  vel  dissidia,  vel  simultates  excitet  inter  plebem  et  pastorem.  Itaque  quotidie  videmus  quam  levi  aut  nulla  de  causa  ecclesiae  suis  pastoribus  sint  infensae:  quia  scilicet  minus  quam  par