30:172  tempore  quo  unctus  est,  non  alia  videbatur  quam  regni  terreni  repraesentatio.  Deus  itaque  sic  operatur,  ut  non  sit  inane  et  vacuum  signum,  aut  inanis  figura,  quae  solos  oculos  perstringeret:  sed  cum  signo  coniunctus  fuit  Domini  spiritus.  Sic  igitur  hodie  quum  in  baptismo  de  peccatorum  remissione  fimus  certiores:  et  in  coena  docemur  noa  ipsa  filii  Dei  substantia  vivere,  quoniam  communicatur  nobis,  ut  in  nobis  habitet,  et  nos  ipsius  membra  simus,  ne  signa  illa  existimemus  esse  inania  quaedam  spectacula,  sed  rerum  veritatem  nobis  in  illis  exhiberi:  ac  proinde  quemadmodum  aqua  visibili  lavamur  et  sordibus  purgamur,  ita  Deum  vi  sancti  sui  spiritus  animas  nostras  ab  omni  macula  purgare.  Et  quemadmodum  vel  in  aquam  mergimur,  vel  supra  caput  aqua  rigamur,  ita  Deum  efficere  sciamus  ut  mundo  moriamur,  et  vetus  noster  homo  cum  Domino  nostro  Iesu  Christo  moriatur,  qui  baptismi  autor  est,  et  illud  in  persona  sua  consecravit,  ut  certiores  fiamus  nos  omnium  ipsius  bonorum  fieri  participes,  quum  pignus  istud  accipimus  quo  ad  veram  et  perfectam  spem  deducimur.  Idem  esto  de  coena  dictum.  Hoc  igitur  esto  firmum  axioma,  Deum  non  inanibus  figuris  nos  ludere,  quum  signum  aliquod  aut  figuram  exhibet;  sed  dare  tanquam  pignus  certum  et  indubitabile  omnium  promissionum,  quae  verbo  ipsius  continentur.  Hinc  etiam  apparet  quo  dementiae  homines  venerint  et  quam  diabolicus  furor  fuerit,  quum  ausi  sunt  ipsi  sibi  signa  fingere  rerum  divinarum;  quod  in  papatu  factum  videmus.  Nam  si  quaeras,  quo  autore  figura  illa  seu  signum,  quod  vocant  extremam  unctionem,  in  ecclesiam  invecta  sit,  quid  aliud  quam  veterem  nescio  quam  consuetudinem  proferent?  Verum  primis  illis  temporibus  Deus  miraculis  evangelii  veritatem  commendare  et  tueri  volens,  spiritum  suum  sub  visibilibus  signis  communicabat.  Itaque  tum  adhibito  olei  signo  aegroti  valetudinem  recuperabant:  sed  illa  fuerunt  momentanea.  Sed  qui  hodie  signa  ista  volunt  in  usum  revocare,  quomodo  spiritum  sanctum  signis  alligabunt,  et  omnibus  datum  iri  persuadebunt  quibus  haec  unctio  fuerit  communicata,  aut  a  morbis  recretum  iri?  an  quod  est  unius  Dei  proprium  habent  in  potestate?  Hinc  igitur  illorum  insignis  arrogantia  et  sacrilega  audacia  satis  apparet,  quum  signa  audent  instituere,  quorum  vis  esse  nulla  potest,  quum  unius  Dei  sit  gratiae  suae  signa  hominibus  dare.  Quae  vero  ista  audacia  est,  quod  figuram  baptismi  corruperunt  additis  illis  suis  inventis,  sputo,  luminibus,  oleo  et  similibus,  quae  singula  suam  significationem  habere  propriam  volunt.  Sed  quis  implebit  quae  figuris  illis  significari  dicunt:  an  habent  illi  in  spiritum  sanctum  potestatem?  an  possunt  ipsum  alligare  inanibus  istis  suis  commentis  et  vanis  speculationibus?  Quare  si  signorum  impletionem  habere  cupi-