52:171  171  EPIST.  PAULI  AD  THESSALONICENSES  I  172  posset  vitam  et  mortem  designare,  et  hic  sensus  esset  plenior.  Quamquam  de  quotidiano  somno  non  inepte  etiam  exponere  liceat.  Summa  est,  in  hoc  mortuum  esse  Christum,  ut  sua  vita,  quae  perpetua  est  et  fine  caret,  nos  donaret.  Porro  non  mirum  est  quod  iam  nunc  affirmat  nos  cum  Christo  vivere:  quia  fide  in  regnum  Christi  ingressi,  transimus  a  morte  in  vitam:  Christus  ipse,  in  cuius  corpus  insiti  sumus,  sua  virtute  nos  vivificat  :  et  spiritus,  qui  in  nobis  habitat,  vita  est  propter  iustitiam.  l  l  .  Quare  exhortamini  vos  invicem  et  aedificate  singuli,  sicut  et  facitis.  12.  Rogamus  autem  vos,  fratres,  ut  agnoscatis  eos  qui  laborant  in  vobis,  et  praesunt  vobis  in  Domino,  et  admonent  vos:  13.  ut  eos  habeatis  in  summo  pretio  cum  caritate  propter  opus  ipsorum:  pacem  habete  cum  ipsis.  14.  Hortamur  autem  vos,  fratres,  monete  inordinatos,  consolamini  pusillanimes,  suscipite  infirmos,  patientes  estote  erga  omnes.  11.  Exhortamini.  Idem  est  verbum  quod  habuimus  in  fine  proximi  capitis:  quod  illic  consolari  vertimus,  quia  contextus  id  exigebat.  Nec  male  etiam  huic  loco  eadem  significatio  quadraret.  Nam  quae  hactenus  tractavit,  utriusque  materiam  suppeditant,  tam  consolationis  quam  exhortationis.  Quod  ergo  illis  datur  a  Domino,  inter  se  communicare  iubet.  Addit,  ut  se  aedificent:  hoc  est  confirment  in  ea  doctrina.  Sed  ne  videatur  eorum  negligentiam  perstringere,  simul  dicit  eos  sponte  facere  quod  praecipit.  Verum  quae  nostra  est  ad  bonum  segnities,  qui  optime  omnium  sunt  animati,  stimulis  tamen  semper  indigent.  12.  Rogamus  autem.  Admonitio  valde  necessaria.  Quia  enim  parvi  ducitur  regnum  Dei,  vel  saltem  non  aestimatur  pro  sua  dignitate  :  hinc  etiam  sequitur  contemptus  piorum  doctorum.  Plerique  vero  eorum  hac  ingratitudine  offensi,  non  tam  quia  se  contemni  vident,  quam  quod  inde  colligunt,  non  haberi  Domino  suo  honorem,  tepidiores  redduntur.  Et  Deus  etiam  iuste  mundum  ulciscitur,  quod  bonis  ministris,  quibus  ingratus  est,  eum  privat.  Quare  non  tam  ministrorum  interest,  quam  totius  ecclesiae,  haberi  in  pretio  eos  qui  fideliter  praesunt.  Atque  hac  de  causa  Paulus  tam  sollicite  ipsos  commendat.  Agnoscere  hic  significat  habere  rationem  aut  respectum:  sed  innuit  Paulus  ideo  minus  honoris  exhiberi  ipsis  doctoribus  quam  deceat,  quoniam  vulgo  non  consideratur  eorum  labor.  Sed  notandum  est  quibus  titulis  pastores  designet.  Primo  dicit  eos  laborare:  unde  sequitur  e  numero  pastorum  excludi  omnes  otiosos  ventres.  Porro  speciem  laboris  exprimit,  quum  addit,  qui  vos  admonent,  vel  instituunt.  Quicunque  ergo  munus  docendi  non  obeunt,  frustra  se  pastorum  nomine  venditant.