55:170  qui  tam  eximia  fide  praediti  fuerunt,  nondum  habuisse  tam  uberem  credendi  materiam  quam  nos  habemus.  Rationem  continuo  post  addit:  quia  Deus  voluerit  nos  omnes  coadunare  in  unum  corpus:  ideoque  exiguam  illis  gratiae  portionem  distribuerit,  ut  solidam  perfectionem  in  tempus  nostrum,  hoc  est  in  adventum  Christi,  differret.  Atque  hoc  singulare  Dei  erga  nos  benevolentiae  est  documentum,  quod  tametsi  liberalem  se  ab  initio  mundi  ostenderit  suis  filiis,  sio  tamen  gratiam  suam  attemperavit,  ut  totius  corporis  saluti  prospiceret.  Quid  amplius  desiderare  quisquam  nostrum  possit  quam  in  omnibus  beneficiis,  quibus  Deus  Abraha��),  Mosen,  Davidem  et  omnes  patriarches,  prophetas  et  pios  reges  prosequutus  est,  habitam  esse  sui  rationem,  ut  cum  illis  in  Christi  corpus  coalescat?  Sciamus  ergo  nos  bis  ac  ter  ingratos  esse  Deo,  si  minus  in  nobis  fidei  sub  Christi  regno  appareat,  quam  se  habere  patres  sub  lege  tam  insignibus  patientiae  exemplis  probarunt.  Quod  dicit,  nondum  adeptos  fuisse  promissionem:  de  ultima  promissionum  clausula  intelligi  debet,  quae  nobis  promulgata  fuit  in  Christo.  Qua  de  re  aliquid  iam  ante  dictum  est.  CAPUT  XII.  1.  Proinde,  nos  quoque  quum  tanta  circumdati  simus  nube  testium,  deposito  omni  onere  et  peccato  quod  nos  circumstat,  per  patientiam  curramus  in  proposito  nobis  certamine:  2.  intuentes  in  principem  et  perfectorem  fidei  Iesum,  qui  pro  gaudio  sibi  proposito  pertulit  crucem,  ignominia  contempta,  et  in  dextra  throni  Dei  consedit.  3.  Ac  reputate  quis  hic  fuerit  qui  tantam  in  se  sustinuit  ab  impiis  contradictionem,  ut  ne  fatigemini  animabus  vestris  soluti.  1.  Proinde  nos  quoque.  Haec  conclusio  est  quasi  epilogus  proximi  capitis  :  ubi  demonstrat  quorsum  recitaverit  illum  sanctorum  catalogum,  quorum  fides  sub  lege  excelluit:  nempe  ut  se  quisque  comparet  ad  eorum  imitationem.  Et  metaphorice  copiosam  multitudinem  vocat  nubem.  Densum  enim  raro  opponitur.  Si  pauci  essent  numero,  tamen  suo  exemplo  incitare  nos  deberent:  sed  ubi  ingens  est  turba,  acriores  stimulos  addere  nobis  debet.  Praeterea  dicit,  nos  densitate  ill��  vel  copia  circumdari,  ut  quocunque  oculos  vertamus,  statim  occurrant  multa  fidei  exempla.  Nomen  testium  non  accipio  generaliter,  ac  si  martyres  Dei  nuncuparet:  sed  refero  ad  praesentem  causam.  Ac  si  diceret,  satis  eorum  testimonio  comprobatam  esse  fidem,  ut  non  sit  haesitandum.  Sunt  enim  virtutes  sanctorum  quasi  testimonia  quae  nos  confirment,  ut  illis  vel  ducibus  vel  sociis  freti,  alacrius  ad  Deum  pergamus.