42:170  tellement  qu'il  sembloit  que  Dieu  leur  vousist  donner  conge  de  mal  faire:  pour  cette  cause  donc  sainct  Paul  dit,  il  est  vray  que  les  meschans  iront  en  empirant,  mais  cependant  Dieu  les  tiendra  serres  quand  il  luy  plaira,  pour  les  faire  cesser,  et  c'est  ce  qu'il  dit  par  son  prophete,  Ils  s'egaieront  et  seront  comme  bestes  sauvages,  mais  ils  seront  tout  esbahis  que  Dieu  leur  dira,  hola,  qu'il  faudra  qu'ils  demeurent  la  tout  court:  voila  ce  que  nous  avons  a  noter  quant  a  ce  passage.  Or  en  la  fin  il  est  dit,  que  depuis  le  temps  que  le  sacrifice  continuel  sera  oste,  et  que  l'abomination  horrible  sera  mise,  il  y  ha  deux  mille  deux  cens  nonante  iours,  et  puis  il  adiouste,  Bien-heureux  est  celuy  qui  attend,  et  qui  parvient  iusques  a  mille  trois  cens  trente  cinq  iours.  Voici  un  passage  qui  est  asses  obscur,  et  pour  ce  il  est  diversement  expose:  aucuns  l'exposent  de  ce  temps  duquel  il  ha  este  fait  mention  ci  dessus,  c'est  a  scavoir,  quand  le  temple  fut  prophane  par  Antiochus,  et  que  l'idole  de  Iupiter  fut  la  mise,  car  cette  prophanation  du  temple  dura  environ  trois  ans  et  demi.  Or  ici  nostre  Seigneur  Iesus  nomme  mille  deux  cens  nonante  iours  qui  sont  environ  ce  terme  la:  ainsi  donc  il  semble  qu'il  vueille  dire  depuis  que  l'abomination  sera  mise  au  temple,  voila  un  terme  qui  passera  de  grandes  afflictions,  qu'alors  il  ne  sera  question  que  de  coupper  gorge  aux  pauvres  fideles,  de  brusler  les  livres  de  la  loy,  de  gehenner  et  torturer  tous  ceux  qui  en  auront  quelques  copies,  de  tirer  aux  tourmens  les  femmes,  et  les  petis  enfans,  voila  donc  une  cruaute  si  horrible  et  si  enorme  que  rien  plus,  laquelle  ha  continue  par  l'espace  de  trois  ans  et  demi.  Or  puis  apres  l'idole  est  iettee  hors  du  temple,  mais  encores  le  temple  n'est  pas  bien  nettoie,  iusques  au  bout  de  six  ans  et  huit  mois  ou  environ,  voila  pourquoy  ceux  ici  prennent  le  passage  du  prophete,  comme  s'il  estoit  dit  qu'il  faudra  que  les  enfans  de  Dieu  endurent  beaucoup  de  tourmens  et  de  tirannies,  par  l'espace  de  trois  ans  et  demi,  apres  que  l'abomination  sera  mise,  et  puis  apres  ils  viendront  a  un  autre  terme  de  mille,  c'est  a  dire,  qu'ils  passeront  un  second  terme,  comme  si  le  nombre  estoit  double,  ce  qu'il  n'est  pas,  or  cependant  on  tire  ceci  iusques  en  la  fin  du  monde,  prenant  les  iours  pour  ans,  comme  quelquesfois  cela  est  en  l'escriture  saincte,  or  cependant  ils  nombrent  deux  mille  et  six  cens  iours,  car  ici  il  y  ha  deux  cens  nonante,  et  puis  trois  cens  trente-cinq,  voila  donc  vingt-cinq  iours  outre  les  trois  cens  trentecinq,  et  les  deux  cens  nonante,  ils  disent  donc  qu'il  y  ha  deux  mille  et  six  cens  ans,  et  cuident  que  Daniel  ait  adverti  que  le  monde  pourra  encores  durer  deux  mille  et  six  cens  ans,  et  qu'il  sera  tousiours  en  trouble  et  fascherie,  que  l'Eglise  ne  cessera  iamais  d'estre  persecutee  par  les  ennemis.