30:170  Nae  multum  abest:  sed  a  Deo  praeparatum,  quod  opus  Domini  David  in  sese  agnoscit.  Quemadmodum  autem  faciem  nostram  in  speculo  contemplamur,  ita  Deus  in  sese  omnem  potentiam  et  virtutem  contemplatur,  ut  nos  natura  vacuos  omni  bono  donis  suis  pro  voluntate  et  arbitrio  exornet:  quamobrem  et  alio  Psalmo  dicitur,  Deum  opus  manuum  nostrarum  disponere.  Deo  itaque  visum  est  Davidem  abiectae  conditionis  hominem  ad  regiam  dignitatem  evehere:  Quid  ita?  Nempe  a  caulis  et  pastorum  stabulis  eum  vocavit,  ut  in  eo  fieret  Dei  potentia  conspectior,  et  maiorem  Dei  laudandi  occasionem  haberet,  quum  se  nullis  suis  viribus,  nulla  industria,  nullo  consilio  potuisse  ad  tantum  dignitatis  fastigium  venire  cognosceret.  Atque  D.  Paulus  in  priore  ad  Corinthios  satis  evidenter  istud  docuit  in  fidelium  electione,  quum  de  tota  ecclesia  loquens,  ait:  Multos  esse  in  mundo  nobiles  et  praestantes  viros,  a  quibus  videbatur  Deus  posse  facere  initium  suae  electionis,  sed  quoniam  solent  homines  nimium  efferri  gloria,  et  Deo  se  aequales  facere,  ut  omnis  carnis  gloria  tollatur,  deiecisse  alta  mundi,  et  parva  et  abiecta  elegisse,  ut  norint  omnes  nullam  esse  altitudinem  neque  dignitatem,  nisi  quae  ab  ipso  proficiscitur.  Ac  sane  gloriari  nos  in  Deo  par  est,  et  nobis  ipsis  gratuitam  ipsius  electionem  gratulari.  Quandoquidem  enim  natura  sumus  filii  irae  et  maledictionis,  ubi  obsecro  nostra  erit  gloriatio,  nisi  in  eo  quod  adoptione  facti  filii  Dei  sumus?  Quamobrem  usurpanda  nobis  Pauli  doctrina,  qui  Deum  dicit  vocare  ea  quae  non  sunt,  tanquam  sint,  ut  confundat  ea  quae  sunt:  ut  cognoscamus  eum  esse  a  quo  quidquid  sumus  habemus,  ut  se  quisque  fideliter  exerceat  in  vocatione,  et  proximorum  aedificationi  studeat.  Nam  et  in  hunc  finem  nos  e  luto  et  foetore  superstitionum  et  pravitatis  eduxit,  ut  vasa  fiamus  sanctificata  ad  omne  bonum  opus:  et  ab  infidelibus  et  incredulis  separavit,  ut  in  Dominum  nostrum  Iesum  Christum  inseramur.  Neque  vero  apostolus  de  uno  aut  altero  singulatim  mentionem  facit,  sed  de  omnibus  in  genere  fidelibus:  quorum  patrem  Abrahamum  facit,  et  comparationem  instituit  Adae  filiorum,  cum  filiis  gratuito  a  Domino  adoptatis.  Vere  enim  filii  Adae  nascimur  in  mundum  venientes,  in  qua  creatione  sola  inest  maledictio:  sed  renasci  nos  oportet,  et  in  Dominum  nostrum  Iesum  Christum  inseri,  ut  in  nobis  obedientia  Deo  placens  inveniatur.  Et  de  istis  hactenus.  Iam  vero  agite,  ete.