10.1:170  genitus  est  Christus,  procreatum  esse  ex  eius  semine.  Sicuti  etiam  quum  dicitur  Booz  genitus  ex  Rahab,  similis  notatur  generatio.  Nec  vero  Matthaeus  hic  virginem  quasi  canale  describit,  per  quod  fluxerit  Christus:  sed  hunc  mirificum  generandi  morem  a  vulgari  discernit,  quod  per  eam  ex  semine  Davidis  genitus  fuerit  Christus.  Eadem  enim  ratione  qua  Isaac  ex  Abraham,  Solomon  ex  Davide,  Ioseph  ex  Iacob,  similiter  Christus  ex  matre  genitus  esse  dicitur.  Sermonis  enim  seriem  evangelista  contexit.  In  decimo  argumento  suam  impudentiam  nimis  turpiter  prodit.  Quomodo  enim  quadrabunt,  secundum  carnem  Christum  esse  ex  semine  Davidis,  et  tamen  non  aliter  vocari  filium,  nisi  quia  promissus  est  ac  donatus?  Nam  postquam  filium  Dei  nominavit  Paulus,  continuo  post  subiiciens  (Rom.  1,  3),  secundum  carnem  esse  ex  semine  Davidis,  distinctum  certe  aliquid  a  divina  essentia  notat.  Sic  et  nono  capite  (v.  5)  Deum  benedictum  praedicans,  seorsum  ponit,  secundum  carnem  ex  Iudaeis  descendere.  Iam  nisi  vere  genitus  esset  ex  semine  Davidis,  quid  valebit  loquutio  illa,  ut  sit  fructus  ventris  eius  et  ex  lumbis  descenderit?  Stulte  autem  obiicit,  non  posse  dici  naturalem  Davidis  filium,  quia  verbum  factum  est  caro:  quia  constat  non  alio  sensu  hoc  dici,  nisi  quia  carnem  induit  et  manifestatus  est  in  carne.  Mulieri  non  esse  generativum  semen  dicit  Menno:  sed  quis  praeter  communem  omnium  sententiam  indocti  hominis  figmento  credet?  Quanquam  mirum  est  sic  ipsum  verum  miraculum  negare,  dum  falsissimum  portentum  de  suo  affingit,  in  quo  admirabilior  sit  Dei  potentia,  si  verum  esset  quod  persuadet,  aeternam  Dei  essentiam  mutatam  esse  in  mortale  corpus.  Nugatorium  etiam  est  quod  repetit  non  poase  doceri  certo  Mariam  esse  genitam  ex  semine  Davidis:  quia  Matthaeus  probare  volens  Christum  esse  genitum  ex  semine  Davidis,  dum  hoc  uno  contentus  est,  ex  Maria  esse  genitum,  certe  pro  re  confessa  sumit,  Mariam  fuisse  consanguineam  Ioseph.  Quod  autem  adducit  semen  pro  posteritate  sumi,  nimis  dilutum  est:  quia  non  simpliciter  vocatur  semen,  sed  dicitur  esse  ex  semine.  Impudentia  etiam  minime  tolerabilis  est  clarum  in  verbis  Pauli  sensum  pervertere,  ut  Christum  ex  semine  Davidis  factum  vel  formatum  esse  neget.  Quod  ad  undecimum  argumentum  spectat,  fateor  ecclesiam  spiritualiter  esse  carnem  ex  carne  Christi,  ete.  Sed  vicissim  dico,  ut  hoc  fieret,  Christum  sumpsisse  ex  hominibus  carnem,  in  qua  se  pro  ipsis  sanctificaret.  Christum  vocari  coelestem  e  coelo,  quia  inde  carnem  attulerit,  omni  ratione  caret:  idque  antithesis  clare  evincit.  Terrenus  enim  homo  tantundem  valet  atque  animalis:  quum  tamen  animam  ex  terra