52:169  169  CAPUT  V.  170  officium  admonet:  ut  scilicet  diem  illum  quamvis  remotum  spe  aspiciant.  Atque  huc  pertinet  metaphora  diei  et  lucis.  Impios  secure  delitiantes  opprimet  Christi  adventus,  quia  tenebris  obruti  nihil  cernunt:  nulla  enim  densior  caligo  quam  Dei  ignorantia.  At  nos,  quibus  per  evangelii  sui  fidem  Christus  illuxit,  multum  ab  illis  differimus:  vere  enim  impletur  in  nobis  illud  Iesaiae  (60,  2),  quod,  dum  tenebrae  operiunt  terram,  super  nos  oritur  Dominus,  et  gloria  eius  in  nobis  conspicua  est.  Absurdum  ergo  esse  admonet,  nos  velut  sopitos  a  Christo  deprehendi,  vel  nihil  videntes,  quum  plena  lux  nobis  affulgeat.  Atque  hoc  rursum  confirmat,  quum  dicit  nos  non  esse  n  o  c  t  i  s  vel  t  e  n  e  b  r  a  -  rum:  quia  scilicet  Dominus  nos  inde  eripuit.  Perinde  enim  est  ac  si  diceret,  non  esse  nos  hac  conditione  illuminatos  a  Domino  ut  in  tenebris  erremus.  6.  Ergo  ne  dormiamus  ut  reliqui,  sed  vigilemus  et  sobrii  simus.  7.  Qui  enim  dormiunt,  nocte  dormiunt:  et  qui  ebrii  sunt,  nocte  ebrii  sunt.  8t  Nos  autem,  qui  sumus  diei,  sobrii  simus,  induti  thorace  fidei  et  caritatis,  et  galea  spe  salutis:  9.  quia  non  constituit  nos  Deus  in  iram,  sed  in  acquisitionem  salutis,  per  Dominum  nostrum  Iesum  Christum:  10.  qui  mortuus  est  pro  nobis,  ut  sive  vigilemus,  sive  dormiamus,  simul  cum  ipso  vivamus.  6.  Ergo  ne  dormiamus.  Alias  metaphoras  adiungit  priori  affines.  Sicut  enim  nuper  ostendit  minime  consentaneum  esse  ut  in  luce  caecutiant:  sic  nunc  admonet  indecorum  ac  turpe  esse,  dormire  medio  die,  aut  inebriari.  Quemadmodum  vero  evangelii  doctrinam,  qua  nobis  sol  iustitiae  Christus  patefit,  diem  appellat:  ita  quum  de  somno  et  ebrietate  loquitur,  non  somnum  naturalem,  neque  ebrietatem  ex  vino  intelligit,  sed  mentis  stuporem:  quum  Deum  et  nos  ipsos  obliti  secure  vitiis  nostris  indulgemus.  Ne  dormiamus,  inquit:  hoc  est,  ne  in  socordiam  demersi  obstupescamus  in  mundo,  quemadmodum  reliqui:  hoc  est,  infideles,  quibus  ignorantia  Dei,  instar  obscurae  noctis,  sensum  et  rationem  adimit.  Sed  vigilemus.  Hoc  est,  intento  animo  respiciamus  in  Dominum.  Et  sobrii  simus:  hoc  est,  abiectis  huius  mundi  curis,  quae  onere  suo  nos  degravant,  excussis  pravis  cupiditatibus,  soluti  et  alacres  tendamus  in  coelum.  Haec  enim  spiritualis  est  sobrietas,  dum  ita  parce  et  continenter  utimur  hoc  mundo,  ne  eius  illecebris  simus  impliciti.  8.  Induti  thorace.  Hoc  addidit  quo  melius  torporem  nobis  excuteret:  nam  veluti  ad  arma  conclamat,  ut  ostendat  non  esse  dormiendi  tempus.  Belli  quidem  nomen  subticet:  verum  dum  nos  armat  thorace  et  galea,  proeliandum  esse  admonet.