5:169  PRAEFATIO  IOANNIS  CALVINI  AD  AMICUM  QUENDAM.  Quum  mecum  pridem  nonnulli  pii  viri  agerent,  et  subinde  etiam  instarent  ut  publice  aliquid  ederem,  ad  eorum  intemperiem  compescendam,  qui  de  animarum  vel  dormitione,  vel  interitu,  imperite  simul  ac  tumultuose  hodie  disputant:  nullis  tamen  hactenus  nec  precibus,  nec  flagitationibus  cesseram.  Adeo  mihi  ab  omni  contentionis  genere  abhorrebat  animus.  Et  erat  tum  sane  quod  excusarem:  partim,  quia  sperabam  fore  ut  ineptum  istud  dogma  statim,  nullo  subscriptore,  evanesceret:  aut  certe  inter  pauculos  nugatores  delitesceret:  partim,  quod  mihi  minime  expeditum  erat  cum  iis  manum  conserere,  qui  starent  ab  adversis  partibus:  quorum  nec  castra,  nec  tela,  nec  subterfugia  noveram.  Nondum  enim  quidquam  ad  me  perlatum  erat,  praeter  murmura  et  raucos  strepitus:  ut  congredi  cum  iis  qui  in  arenam  nondum  prodierant,  nihil  prorsus  aliud  videretur,  quam  aerem  clausis  oculis  verberare.  At  de  successu  longe  aliter  accidit  quam  speraveram.  Siquidem  blaterones  illi  tanta  strenuitate  in  partes  suas  incubuerunt,  ut  aliquot  iam  hominum  millia  in  eandem  secum  insaniam  traxerint.  Et  ipsum  etiam  malum  (ut  video)  incruduit.  Quidam  enim  principio  confuse  garriebant,  mortuorum  animas  dormire:  neque  definiebant  quid  per  somnum  vellent  intelligi.  Emerserunt  postea  ψυχοκτόνοι  isti,  qui  prorsus  eas  iugulant,  sed  sine  vulnere.  Illorum  quidem  errorem  non  ferendum,  horum  vero  insaniam  graviter  coercendam  existimo.  Utrosque  nec  ratione  nec  iudicio  niti.  Verum  id  aliis  persuadere  non  ita  facile  est:  nisi  vanitatem  palam,  et  (quod  dicitur)  in  os  refellam:  quae  non  nisi  in  eorum  scriptis  deprehenditur.  Dicuntur  autem  suas  nugas  nescio  quibus  schedulis  ventilare,  quas  mihi  necdum  videre  contigit.  Tantum  ab  amico  notulas  quasdam  accepi:  quibus  perscripserat  quae  vel  ex  ore  loquentium  excipere  illi  cursim  licuerat,  vel  undecunque  colligere.  Altera  igitur  excusatio  quanquam  ex  dimidia  parte  sublata  est,  ob  notulas:  ex  altera  tamen  mihi  nunc  quoque  superest.  Verum  quum  illis  susurris  et  qua  maxime  pollent  garrulitate  clanculum  se  insinuantes  non  pauciores  suo  errore  illaqueent,  quam  si  excusis  libris  publice  cursitarent:  causam  mihi  habere  non  videor  quin  veritatis  proditor  dicar,  si  in  tanta  necessitate  taceam  ac  dissimulem.  Certe  quando  permagnum  operae  meae  usum  imperitioribus  et  minus  exercitatis  fore  confido,  nonnullum  etiam  et  mediocriter  eruditis,  qui  hoc  argumentum  levius  attigerint:  non  dubitabo  apud  bonos  omnes  deponere  fidei  meae  rationem:  non  illam  quidem  fortassis  satis  instructam  omnibus  et  machinis  quibus  impetum  in  hostem  faciat,  et  praesidiis,  quibus  arceat:  sed  non  penitus  exarmatam.  Quod  si  per  eorum  importunitatem  licuisset,  qui  haec  somnia  in  vulgus  spargunt,  libens  abstinuissem  me  ab  hoc  genere  certaminis:  quod  non  tantum  fructus  refert,  quantum  insumit  operae:  quum  praesertim  hac  in  parte  valere  existimarem  apostoli  exhortationem,  si  quando  usui  foret,  ut  ad  sobrietatem  sapiamus.  Et  quanquam  isti  quam  optamus  sobrietatem  nobis  non  permittunt,  modice  tamen,  aut  etiam  intra  modum  disseram.  Atque  utinam  inventa  esset  alia  ratio,  quae  malum  hoc  plus  nimio  pullulascens  mature  recideret:  ne,  velut  cancer,  magis  ac  magis  in  dies  serpat.  Neque  tamen  nunc  primum  nascitur.  Siquidem  legimus  Arabicos  fuisse  quosdam  huius  dogmatis  autores  qui  iactarent  animam  cum  cor-