52:168  quasi  fur  opprimat.  5.  Omnes  vos  filii  lucis  estis?  et  filii  diei:  non  sumus  noctis,  neque  tenebrarum.  1.  Porro  de  temporibus.  Nunc  tertio  loco  eos  a  curiosa  et  inutili  temporum  inquisitione  retrahit:  interea  vero  admonet  ut  assidue  ad  Christum  excipiendum  sint  parati.  Quamquam  occupatione  utitur,  opus  esse  negans  de  illis  scribi  quae  curiosi  homines  desiderant.  Nam  hoc  nimiae  incredulitatis  signum,  non  credere  quae  Dominus  praedicit,  nisi  diem  certis  circumstantiis  designet,  ac  veluti  digito  ostendat.  Quia  ergo  inter  ambiguas  opiniones  vacillant,  qui  sibi  flagitant  notari  temporum  articulos,  ac  si  ex  probabili  demonstratione  coniecturam  capere  vellent:  ideo  piis  supervacuas  eiusmodi  disputationes  esse  dicit.  Alia  etiam  ratio  est,  quod  fideles  non  plus  scire  appetunt,  quam  in  Dei  schola  discere  licet.  Diem  porro  adventus  sui  nobis  esse  absconditum  voluit  Christus,  ut  suspensi  quasi  in  excubiis  stemus.  2.  Optime  scitis.  Exactam  notitiam  opponit  anxio  investigandi  studio.  Quid  autem  Thessalonicenses  probe  tenere  asserit?  nempe  diem  Christi  repente  et  exinsperato  venturum,  ut  incredulos,  quasi  fur  dormientes,  opprimat.  Hoc  autem  contrarium  est  evidentibus  signis,  quae  eius  adventum  mundo  eminus  ostentent:  stultum  ergo  esset,  ex  praesagiis  vel  ostentis  velle  statum  habere  tempus.  3.  Quando  enim  dixerint  Explicatio  similitudinis  :  similis  erit  dies  Domini  furi  nocturno.  Cur  hoc?  quia  minime  exspectatus  subito  incredulis  adveniet,  ut  eos  quasi  dormientes  occupet.  Unde  autem  dormitio?  nempe  ex  alto  Dei  contemptu.  Supinam  hanc  oscitantiam  saepe  impiis  exprobant  prophetae:  et  certe  non  extremum  modo  illud  iudicium  ,  sed  quotidiana  secure  exspectant.  Quamvis  Dominus  exitium  denuntiet,  pacem  et  omnia  prospera  sibi  polliceri  non  dubitant.  Atque  in  hanc  exitialem  socordiam  ideo  labuntur,  quia  non  statim  quae  Dominus  futura  pronuntiat,  impleri  vident:  statuunt  enim  fabulosum  esse  quod  non  mox  oculis  apparet.  Ideo  Dominus,  ut  hanc  securitatem  contumaciae  plenam  vindicet,  subito  irruit:  et  ex  summa  felicitate  impios  praeter  spem  omnium  praecipitat.  Talia  interdum  repentini  adventus  documenta  edit:  sed  praecipuum  erit  illud,  quum  Christus  ad  iudicandum  orbem  descendet.  Quod  ipse  etiam  testatur,  tempus  illud  saeculo  Noe  comparans:  quia  tanquam  in  altissima  pace  luxuriabuntur  omnes  (Matth.  24,  37).  Quasi  dolor  partus.  Aptissima  similitudo,  quia  nullum  malum  est  quod  magis  repente  corripiat,  et  quod  acrius  et  infestius  primo  statim  impetu  urgeat.  Adde  quod  m  u  l  i  e  r  praegnans  doloris  materiam  intus  in  utero  gestat  absque  sensu,  donec  inter  epulas  et  risus,  vel  in  medio  somno  corripitur.  4.  Vos  autem,  fratres.  Nunc  quale  sit  fidelium