50:168  loquitur,  in  qua  nihil  desiderari  queat.  Obiiciet  quispiam,  annon  pseudoapostolis  quoque  idem  iactare  saepe  contingit?  fateor:  et  quidem  arrogantius  maioreque  supercilio  quam  ausint  servi  Domini:  sed  res  ipsa  eos  deficit,  quam  Paulo  licuit  in  medium  proferre.  Secundum  membrum,  non  esse  vocatum  per  hominem,  peculiariter  competebat  apostolis:  neque  enim  hoc  vitiosum  tunc  fuisset  in  pastore.  Paulus  ipse  oppidatim  cum  Barnaba  suffragiis  presbyteros  creabat:  idem  fieri  iubet  a  Tito  et  Timotheo.  Atque  ista  est  ordinaria  ratio  eligendi  pastores:  neque  enim  exspectandum  est  dum  revelet  Deus  e  coelo  quos  elegerit.  Cur  ergo  a  se  reiicit  Paulus*  quod  non  modo  malum  non  est,  sed  etiam  est  laudabile?  Iam  dixi  non  satis  fuisse  Paulo,  si  pastorem  se,  aut  unum  quemlibet  ex  evangelii  ministris  probasset:  nam  de  apostolatu  agebatur.  Apostolos  autem  alio  modo  eligi  oportuit,  quam  pastores,  nempe  immediate  (ut  loquuntur)  ab  ipso  Domino.  Ita  Christus  ipse  duodecim  vocavit:  et  quum  successor  esset  subrogandus  in  locum  Iudae,  non  audet  ecclesia  suffragiis  unum  eligere,  sed  ad  sortem  confugit.  Certum  est,  non  adhibitam  fuisse  sortem  in  electionibus  pastorum.  Cur  id  fit  in  ordinatione  Matthiae?  ut  divinitus  cooptetur  :  quia  apostolatum  ab  aliis  ministeriis  discerni  oportebat.  Itaque  ut  se  eximat  Paulus  a  vulgari  ordine  ministrorum,  vocationem  suam  a  Deo  immediatam  esse  contendit.  Sed  quomodo  se  negat  per  homines  vocatum,  quum  Lucas  referat  ipsum  et  Barnabam  ab  Antiochena  ecclesia  fuisse  vocatos?  Respondent  aliqui,  ante  functum  fuisse  apostolatu:  itaque  illam  ordinationem  non  fuisse  fundamentum  apostolatus.  Sed  rursum  potest  excipi,  tunc  primum  gentibus  destinatum  fuisse  apostolum:  quarum  in  numero  erant  Galatae.  Itaque  verior  et  planior  responsio  est,  eum  noluisse  hic  prorsus  excludere  vocationem  ecclesiae:  sed  tantum  ostendere  suum  apostolatum  maiore  praerogativa  niti.  Quod  verum  est:  neque  enim  Antiocheni  Paulo  manus  imposuerunt  proprio  iudicio,  sed  oraculo  iussi.  Quia  igitur  divinitus  per  revelationem  vocatus  fuit,  et  deinde  per  spiritum  sanctum  designatus  ac  nuncupatus  fuit  gentium  apostolus:  sequitur,  non  fuisse  introductum  per  homines,  utcunque  solennis  ritus  ordinationis  postea  accesserit.  Si  cui  placeat  obliqua  inter  Paulum  et