42:168  qu'il  n'y  aura  eu  nulle  correction  ni  amendement,  voiant  cela  donc,  d'autant  plus  faut-il  remercier  nostre  Dieu  affectueusement,  de  ce  qu'il  luy  plaist  tourner  a  nostre  profit  et  salut  les  afflictions  qu'il  nous  envoie,  car  il  est  certain  qu'autant  en  seroitil  de  nous,  comme  de  ceux  que  nous  voions  incorrigibles,  si  ce  n'estoit  que  Dieu  y  besongnast  par  son  sainct  Esprit.  Et  ainsi  donc  connoissons  que  c'est  une  grace  specialle  que  Dieu  fait  a  ses  enfans,  quand  il  les  amene  a  cette  fin,  que  combien  qu'ils  sentent  les  coups  de  la  main  de  Dieu,  si  est-ce  qu'ils  ne  laissent  pas  d'estre  consoles  en  leurs  afflictions,  et  quand  il  est  dit  que  Dieu  ne  fait  pas  une  telle  grace  aux  meschans,  c'est  pour  donner  tant  plus  grand  lustre  a  cette  grace  de  Dieu,  laquelle  il  fait  a  ses  fideles,  et  a  fin  qu'ils  la  magnifient  d'autant  plus,  les  meschans  donc  ne  s'amenderont  point,  mais  ils  feront  meschamment.  Or  quand  nous  aurons  leu  cette  doctrine,  il  faut  aussi  que  nous  ouvrions  les  yeux  pour  connoistre  cela,  ie  vous  prie,  quand  Dieu  nous  fera  la  grace  qu'estans  affliges  nous  l'invoquions,  que  nous  entrions  en  connoissance  de  nos  peches,  que  nous  gemissions,  et  puis  apres  que  nous  voions  les  meschans  qui  endurent  autant  que  nous,  et  d'avantage,  et  ne  laissent  point  sur  cela  de  despiter  Dieu,  de  blasphemer  a  l'encontre  de  luy,  de  heurter  la  comme  par  despit,  quand  nous  voions  que  les  meschans  sont  ainsi  chasties,  ne  devons  nous  pas  bien  gemir  pour  remercier  nostre  Dieu?  et  dire,  helas!  Seigneur,  ie  serois  comme  ceux-la  si  tu  ne  m'avois  attire  a  toy,  car  qui  suis-ie  maintenant?  ie  voi  que  ces  pauvres  malheureux  la  s'en  vont  a  perdition,  et  cependant  tu  m'en  retires,  i'ai  bien  donc  occasion  de  magnifier  ta  grace,  et  une  telle  bonte  paternelle  de  laquelle  il  te  plaist  user  envers  moy,  quand  (di-ie)  nous  voions  tout  cela,  ne  devons-nous  pas  bien  estre  consoles?  il  est  bien  certain:  voila  pourquoy  i'ai  dit  qu'apres  avoir  leu  cette  doctrine,  il  nous  la  faut  appliquer  a  nostre  usage,  et  en  connoistre  l'effect,  et  la  pratique  que  Dieu  nous  monstre  iournellement.  Or  il  ne  reste  que  d'ouvrir  les  yeux,  car  nous  voions  comment  Dieu  frappe  sur  les  meschans,  comment  il  les  mine,  il  leur  envoie  des  afflictions  tant  et  plus,  et  cependant  ils  n'ont  dequoy  se  consoler,  il  faut  qu'ils  grincent  les  dents,  qu'ils  soient  en  tourment  continuel,  les  voila  donc  batus  des  mesmes  verges  que  nous  serons,  mais  Dieu  modere  et  adoucist  les  afflictions  qu'il  nous  envoie,  et  ceux-la  n'ont  rien  sinon  toute  tristesse  et  angoisse.  Or  il  nous  faut  noter  qu'il  y  ha  double  intelligence,  qui  nous  fait  profiter  sous  les  verges  de  Dieu,  l'une  est  quand  nous  connoissons  sa  main,  l'autre  quand  nous  connoissons  la  fin  et  l'intention  pourquoy  il  nous  afflige.  I'ai  dit  qu'en  premier  lieu  il  nous  faut  connoistre  la  main  de  celuy  qui